ادبغزل

ایک وحشت سی ہم پہ طاری تھی

افتخار راغب

ایک وحشت سی ہم پہ طاری تھی

دوست داری جو خو ہماری تھی

 کیا وہی دل ہے آج بھی جس میں

بے قراری ہی بے قراری تھی

 اک طرف دل تھا زخم آلودہ

اک طرف عقل کی سواری تھی

کتنا ظالم تھا التفات اس کا

کتنی دلکش ستم شعاری تھی

 اُن کے آنسو بھی آپشنل نکلے

اور محبت بھی اختیاری تھی

 جب ثمر بار تھیں مری شاخیں

مستقل مجھ پہ سنگ باری تھی

 میں نے مانا کہ میری بھول تھی وہ

ہاں مگر بھول کتنی پیاری تھی

 کون تھے وجہِ افتخار نہ پوچھ

کِن سے منسوب میری خواری تھی

 مجھ کو راغب ملے تھے ایسے دوست

دشمنوں سے بھی جن کی یاری تھی

مزید دکھائیں

افتخار راغب

تخلیقِ کارِ کلامِ دل پذیر، علمبردارِ توازنِ لفظ و معنی ، بدرِ آسمانِ شعر و سخنِ قطر اور افتخارِ بزمِ اردو قطر جناب افتخار راغبؔ کا تعلق ہندوستان کے صوبہ بہار سے ہے۔ پیشے سے سول انجنئیر ہیں اور 1998 میں جامعہ ملیہ اسلامیہ دہلی سے بی ٹیک کی ڈگری حاصل کرنے کے بعد مارچ 1999 سے قطر میں ملازمت کے سلسلے میں مقیم ہیں۔ آپ کے چار شعری مجموعۂ کلام، ’لفظوں میں احساس‘ ، ’خیال چہرہ‘ ، ’غزل درخت‘ اور 'یعنی تو' منظرِ عام پر آکر مقبولیت حاصل کر چکے ہیں۔ غزلوں کا پانچواں مجموعہ اور مزاحیہ شاعری کا پہلا مجموعہ زیرِ ترتیب ہیں۔ آپ کی شاعری کی اینڈرائڈ ایپ بھی بن چکی ہے جسے Google Play Store میں Iftekhar Raghib - Urdu Poetry لکھ کر تلاش کرکے انسٹال کیا جا سکتا ہے اس میں چاروں مجموعہ غزلیات دیدہ زیب انداز میں موجود ہیں. افتخار راغبؔ کا شمار قطر کے فعال ترین ادبی شخصیات میں ہوتا ہے۔ آپ قطر کی قدیم ترین اردو تنظیم بزمِ اردو قطر کے 2010 سے جنرل سکریٹری ہیں اور دیگر ادبی تنظیموں میں بھی پیش پیش رہتے ہیں۔ آپ اپنے پختہ کلام کے حوالے سے پوری اردو دنیا میں نئی نسل کے شعراء میں منفرد شناخت رکھتے ہیں۔

ایک تبصرہ

  1. ایک اچھی غزل ہے. بہت بہت مبارک باد وشکریہ!

متعلقہ

Close