ادبغزل

بے وجہ کوئی ذکر محبت نہیں کرتا

ڈاکٹر محسن عتیق خان

بے وجہ کوئی ذکر محبت نہیں کرتا

دل چوٹ نہ کھائے تو عداوت نہیں کرتا

بس دل کی لگی ہے مجھے اس شوخ ادا سے

چاہا ہے اسے میں نے عبادت نہیں کرتا

آنکھوں سے بتا دیتا ہوں میں اپنی محبت

الفت کو کبھی رقم عبارت نہیں کرتا

بے پردگی کیا کم ہے کہ انداز خرام اور

ظالم دل آدم کی رعایت نہیں کرتا

افشا نہ کیا راز محبت کبھی میں نے

اس واسطے محفل میں ندامت نہیں کرتا

بروقت ملا لیتا ہوں آنکھیں تو میں ان سے

لیکن میں تکلم کی جسارت نہیں کرتا

اصرار سے میرے نہیں اس پر ہے اثر کچھ

اک پل بھی کبھی میری رفاقت نہیں کرتا

غیروں پہ کرم ہوتے ہیں دن رات ہی اسکے

پر مجھ پہ کبھی نظر عنایت نہیں کرتا

مرے دل کے تمنائیں تو سب خاک ہوئی ہیں

میں ان سے تغافل کی شکایت نہیں کرتا

محسنؔ مرا انداز تکلم بھی عجب ہے

دشمن بھی مرا مجھ سے رقابت نہیں کرتا

مزید دکھائیں

ڈاکٹر محسن عتیق خان

ڈاکٹر محسن عتیق خان معروف اونلائن عربی میگزین اقلام الھند کے ایڈیٹر انچیف ہیں اور ہندوستان میں عربی زبان کے واحد افسانہ نگارہیں۔ آپکے مختلف افسانے، مقالے اور مضامین ملک و بیرون ملک کے مختلف رسالوں میں شائع ہو چکے ہیں اور اسکے ساتھ ہی آپکی دو کتابیں بھی منظر عال پر آچکی ہیں۔

ایک تبصرہ

متعلقہ

Close