ادبغزل

حکمت کی آرزو ہے نہ حیرت کی آرزو

حکمت کی آرزو ہے نہ حیرت کی آرزو

اہلِ جنوں کو شدّتِ وحشت کی آرزو

 رگ رگ میں جس کی جذب ہو مہر و وفا کا نور

دیوارِ عشق پر ہے اُسی چھت کی آرزو

 ہر شاخ پر لدے رہیں اُلفت کے برگ و بار

آئے نہ بر کسی کی شرارت کی آرزو

 دل کی تڑپ ہلاک ہی کر دے نہ اب ہمیں

شدّت کا ذوق و شوق ہے شدّت کی آرزو

 پروازِ فکر جانبِ ہفت آسماں رہے

پستی کا رُخ دکھائے نہ جدّت کی آرزو

 رسوا کہیں نہ کر دے تمھیں اے ہماری خاک

اِک پیکرِ غرور سے قربت کی آرزو

 نام و نشاں بھی مٹ گیا میرا تو غم نہیں

مٹنے نہ پائے حق کی حمایت کی آرزو

 کیسے بتاؤں کیسی قیامت اُٹھا گئی

صرف ایک آرزو پہ قناعت کی آرزو

 پوری کہاں ہوئی کبھی دربارِ عشق میں

"بے جبر التفات و عنایت کی آرزو”

 اب ذکر تک نہیں کہیں حرفِ جہاد کا

راغبؔ ہے سب کو مالِ غنیمت کی آرزو

مزید دکھائیں

افتخار راغب

تخلیقِ کارِ کلامِ دل پذیر، علمبردارِ توازنِ لفظ و معنی ، بدرِ آسمانِ شعر و سخنِ قطر اور افتخارِ بزمِ اردو قطر جناب افتخار راغبؔ کا تعلق ہندوستان کے صوبہ بہار سے ہے۔ پیشے سے سول انجنئیر ہیں اور 1998 میں جامعہ ملیہ اسلامیہ دہلی سے بی ٹیک کی ڈگری حاصل کرنے کے بعد مارچ 1999 سے قطر میں ملازمت کے سلسلے میں مقیم ہیں۔ آپ کے چار شعری مجموعۂ کلام، ’لفظوں میں احساس‘ ، ’خیال چہرہ‘ ، ’غزل درخت‘ اور 'یعنی تو' منظرِ عام پر آکر مقبولیت حاصل کر چکے ہیں۔ غزلوں کا پانچواں مجموعہ اور مزاحیہ شاعری کا پہلا مجموعہ زیرِ ترتیب ہیں۔ آپ کی شاعری کی اینڈرائڈ ایپ بھی بن چکی ہے جسے Google Play Store میں Iftekhar Raghib - Urdu Poetry لکھ کر تلاش کرکے انسٹال کیا جا سکتا ہے اس میں چاروں مجموعہ غزلیات دیدہ زیب انداز میں موجود ہیں. افتخار راغبؔ کا شمار قطر کے فعال ترین ادبی شخصیات میں ہوتا ہے۔ آپ قطر کی قدیم ترین اردو تنظیم بزمِ اردو قطر کے 2010 سے جنرل سکریٹری ہیں اور دیگر ادبی تنظیموں میں بھی پیش پیش رہتے ہیں۔ آپ اپنے پختہ کلام کے حوالے سے پوری اردو دنیا میں نئی نسل کے شعراء میں منفرد شناخت رکھتے ہیں۔

متعلقہ

Close