ادبغزل

شگفتہ غزل

افتخار راغبؔ

اچھے دنوں کے خواب دکھانے سے ہم رہے

بھکتوں کو بے وقوف بنانے سے ہم رہے

سیوک ہیں سارے ملک کے فرصت کہاں ہمیں

بیوہ کو اپنی گھر بھی بلانے سے ہم رہے

یوں گھومنے کا شوق ہوا ہے یہاں وہاں

اپنے وطن میں منھ بھی دکھانے سے ہم رہے

کالج کا منھ ہی دیکھے نہ اسکول ہی گئے

پھر بھی نہ باز سب کو پڑھانے سے ہم رہے

اتریں گے بار بار ہوائی جہاز سے

سابرمتی میں ناؤ چلانے سے ہم رہے

نعرے ہی ٹھوستے رہے ہم ان کے کان میں

بھکتوں کو دیش بھکت بنانے سے ہم رہے

سادھو کی طرح جینے کی عادت پڑی ہے یوں

دس لاکھ کا بھی سوٹ جڑھانے سے ہم رہے

جو جل رہے ہیں ان میں ہی ہم ڈالٹے ہیں تیل

بجھتے ہوئے چراغ جلانے سے ہم رہے

بھاشن سے پیٹ بھرتا تو مرتا نہ ایک شخص

کجھ ماسوا اب ان کو کھلانے سے ہم رہے

ہم ہیں جہاں وہیں پہ بہت خوش ہیں دوستو

جاپان جاکے ڈھول بجانے سے ہم رہے

ڈر ہے کہ کوئی چور نہ کہنے لگے ہمیں

ان کی گلی میں آنکھ چرانے سے ہم رہے

 سیوک تو بن گئے پہ ہمیں تجربہ نہ تھا

"اب ڈوبنے سے تم کو بچانے سے ہم رہے”

 راغبؔ ہے ہم کو فکر سوا سو کڑوڑ کی

گو اپنا ایک گھر بھی بسانے سے ہم رہے

مزید دکھائیں

افتخار راغب

تخلیقِ کارِ کلامِ دل پذیر، علمبردارِ توازنِ لفظ و معنی ، بدرِ آسمانِ شعر و سخنِ قطر اور افتخارِ بزمِ اردو قطر جناب افتخار راغبؔ کا تعلق ہندوستان کے صوبہ بہار سے ہے۔ پیشے سے سول انجنئیر ہیں اور 1998 میں جامعہ ملیہ اسلامیہ دہلی سے بی ٹیک کی ڈگری حاصل کرنے کے بعد مارچ 1999 سے قطر میں ملازمت کے سلسلے میں مقیم ہیں۔ آپ کے چار شعری مجموعۂ کلام، ’لفظوں میں احساس‘ ، ’خیال چہرہ‘ ، ’غزل درخت‘ اور 'یعنی تو' منظرِ عام پر آکر مقبولیت حاصل کر چکے ہیں۔ غزلوں کا پانچواں مجموعہ اور مزاحیہ شاعری کا پہلا مجموعہ زیرِ ترتیب ہیں۔ آپ کی شاعری کی اینڈرائڈ ایپ بھی بن چکی ہے جسے Google Play Store میں Iftekhar Raghib - Urdu Poetry لکھ کر تلاش کرکے انسٹال کیا جا سکتا ہے اس میں چاروں مجموعہ غزلیات دیدہ زیب انداز میں موجود ہیں. افتخار راغبؔ کا شمار قطر کے فعال ترین ادبی شخصیات میں ہوتا ہے۔ آپ قطر کی قدیم ترین اردو تنظیم بزمِ اردو قطر کے 2010 سے جنرل سکریٹری ہیں اور دیگر ادبی تنظیموں میں بھی پیش پیش رہتے ہیں۔ آپ اپنے پختہ کلام کے حوالے سے پوری اردو دنیا میں نئی نسل کے شعراء میں منفرد شناخت رکھتے ہیں۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

متعلقہ

Close