ادبغزل

عید مبارک

احمد علی برقی اعظمی

اب عام ہے فیضان خدا عید مبارک
لب پر ہے سبھی کے یہ صدا عید مبارک

رمضان کے روزوں کی بدولت ہے میسر
یہ کیف و مسرت کی فضا عید مبارک

پُرنور ہیں دل جشن کے ماحول میں سب کے
روشن ہے محبت کا دیا عید مبارک

ہرشخص کا سرسبز ہو گلزارِ تمنا
کوئی نہ کسی سے ہو جدا عید مبارک

مشتاق ہے ملنے کے لئے آج وہ مجھ سے
پورا ہوا پیمانِ وفا عید مبارک

تفریق نہیں مذہب و ملت کی کوئی آج
قایم رہے یونہی یہ فضا عید مبارک

ملتے ہیں گلیآ پ تو اخلاص سے ملئے
شامل نہ ہو کوئی بھی ریا عید مبارک

مِل جُل کے کریں آئئے تجدیدِ تعہد
دیں گے نہ کسی کو بھی دگا عید مبارک

یہ بے رخی اچھی نہیں اب تھوک دو غصہ
کیوں مجھ سے ہو تم آج خفا عید مبارک

لو پیش ہے گلدستۂ گُلہائے محبت
خوشبو سے معطر ہے فضا عید مبارک

یہ جشن کا ماحول ہے احمد علی برقیؔ
رمضان کے روزوں کی جزا عید مبارک

مزید دکھائیں

احمد علی برقی اعظمی

ڈاکٹر احمد علی برقیؔ اعظمی اعظم گڑھ کے ایک ادبی خانوادے سے تعلق رکھتے ہیں۔ آپ کے والد ماجد جناب رحمت الہی برقؔ دبستان داغ دہلوی سے وابستہ تھے اور ایک باکمال استاد شاعر تھے۔ برقیؔ اعظمی ان دنوں آل آنڈیا ریڈیو میں شعبہ فارسی کے عہدے سے سبکدوش ہونے کے بعد اب بھی عارضی طور سے اسی شعبے سے وابستہ ہیں۔۔ فی البدیہہ اور موضوعاتی شاعری میں آپ کو ملکہ حاصل ہے۔ آپ کی خاص دل چسپیاں جدید سائنس اور ٹکنالوجی خصوصاً اردو کی ویب سائٹس میں ہے۔ اردو و فارسی میں یکساں قدرت رکھتے ہیں۔ روحِ سخن آپ کا پہلا مجموعہ کلام ہے۔

متعلقہ

Close