ادبغزل

نہیں جاتی ہے کوئی رایگاں تدبیر بسم اللہ

احمد علی برقیؔ اعظمی

نہیں جاتی ہے کوئی رایگاں تدبیر بسم اللہ

پس ازتخریب کرتے ہیں نئی تعمیر بسم اللہ

لڑائے گی مری تدبیر اب تقدیر سے پنجہ

لکھے گا از سرِ نو کاتبِ تقدیر بسم اللہ

ہمارا عزمِ راسخ کامیابی کی ضمانت ہے

ہمارے حق میں ہوگی خواب کی تعبیر بسم اللہ

ہمارا کام ہے کوشش کریں ہم بازیابی کی

ملے گی اِک نہ اِک دن گمشدہ جاگیر بسم اللہ

پہونچ جائیں گے اپنے کیفرِ کردار کو خود ہی

ستمگر ہیں یہ بیشک لایقِ تعزیر بسم اللہ

’’شبِ تاریک کے دامن سے ہوتی ہے سحر پیدا‘‘

نہ ہوگا مستقل یہ نالۂ شبگیر بسم اللہ

بھروسہ قوتِ بازو پہ رکھ عزمِ مصمم سے

نہ ہوگی پاؤں میں برقیؔ ترے زنجیر بسم اللہ

مزید دکھائیں

احمد علی برقی اعظمی

ڈاکٹر احمد علی برقیؔ اعظمی اعظم گڑھ کے ایک ادبی خانوادے سے تعلق رکھتے ہیں۔ آپ کے والد ماجد جناب رحمت الہی برقؔ دبستان داغ دہلوی سے وابستہ تھے اور ایک باکمال استاد شاعر تھے۔ برقیؔ اعظمی ان دنوں آل آنڈیا ریڈیو میں شعبہ فارسی کے عہدے سے سبکدوش ہونے کے بعد اب بھی عارضی طور سے اسی شعبے سے وابستہ ہیں۔۔ فی البدیہہ اور موضوعاتی شاعری میں آپ کو ملکہ حاصل ہے۔ آپ کی خاص دل چسپیاں جدید سائنس اور ٹکنالوجی خصوصاً اردو کی ویب سائٹس میں ہے۔ اردو و فارسی میں یکساں قدرت رکھتے ہیں۔ روحِ سخن آپ کا پہلا مجموعہ کلام ہے۔

متعلقہ

Close