ادبغزل

کہاں تک صبر کی تلقین بادل

افتخار راغبؔ

کہاں تک صبر کی تلقین بادل

دعائے آب پر آمین بادل

جھلس جائیں گے پر ہونے نہ دیں گے

ہم اپنی پیاس کی توہین بادل

کہاں برسے کبھی صحراے جاں میں

گرجتے رہ گئے غمگین بادل

ہم اپنی پیاس پی کر جی رہے ہیں

ہمارے دل کو ہے تسکین بادل

نہیں قائل کسی تفریق کے ہم

محبت ہے ہمارا دین بادل

بلا کا جذبہٴ  اخلاص بھی ہے

نمائش کے بھی ہیں شوقین بادل

مسلسل مارے مارے پھر رہے ہیں

ہوا کے دوش پر مسکین بادل

جگاتے ہیں ہمیشہ آس ہی بس

تِرے آنچل سے ہیں رنگین بادل

ہو کچھ یوں نخلِ فن شاداب راغبؔ

لٹائیں داد اور تحسین بادل

مزید دکھائیں

افتخار راغب

تخلیقِ کارِ کلامِ دل پذیر، علمبردارِ توازنِ لفظ و معنی ، بدرِ آسمانِ شعر و سخنِ قطر اور افتخارِ بزمِ اردو قطر جناب افتخار راغبؔ کا تعلق ہندوستان کے صوبہ بہار سے ہے۔ پیشے سے سول انجنئیر ہیں اور 1998 میں جامعہ ملیہ اسلامیہ دہلی سے بی ٹیک کی ڈگری حاصل کرنے کے بعد مارچ 1999 سے قطر میں ملازمت کے سلسلے میں مقیم ہیں۔ آپ کے چار شعری مجموعۂ کلام، ’لفظوں میں احساس‘ ، ’خیال چہرہ‘ ، ’غزل درخت‘ اور 'یعنی تو' منظرِ عام پر آکر مقبولیت حاصل کر چکے ہیں۔ غزلوں کا پانچواں مجموعہ اور مزاحیہ شاعری کا پہلا مجموعہ زیرِ ترتیب ہیں۔ آپ کی شاعری کی اینڈرائڈ ایپ بھی بن چکی ہے جسے Google Play Store میں Iftekhar Raghib - Urdu Poetry لکھ کر تلاش کرکے انسٹال کیا جا سکتا ہے اس میں چاروں مجموعہ غزلیات دیدہ زیب انداز میں موجود ہیں. افتخار راغبؔ کا شمار قطر کے فعال ترین ادبی شخصیات میں ہوتا ہے۔ آپ قطر کی قدیم ترین اردو تنظیم بزمِ اردو قطر کے 2010 سے جنرل سکریٹری ہیں اور دیگر ادبی تنظیموں میں بھی پیش پیش رہتے ہیں۔ آپ اپنے پختہ کلام کے حوالے سے پوری اردو دنیا میں نئی نسل کے شعراء میں منفرد شناخت رکھتے ہیں۔

متعلقہ

Back to top button
Close