ادبغزل

کہاں تھا اتنا محبت کا نور آنکھوں میں

کہاں تھا اتنا محبت کا نور آنکھوں میں
کسی نے دیکھ لیا ہے حضور آنکھوں میں

یقیں نہیں تو ذرا جھانک کر کبھی دیکھو
کسی کا عکس ہے پنہاں ضرور آنکھوں میں

نہ دیکھ اتنی محبت سے میری آنکھوں کو
بکھر نہ جائے غبارِ غرور آنکھوں میں

امیدِ عدل ہے تجھ کو اگر عدالت سے
تو کیوں ہے خوف تری بے قصور آنکھوں میں

نشاط بخش نگاہیں تو خوش نما چہرہ
ترے ہی دم سے ہے کیف و سرور آنکھوں میں

مرے قلم میں رہے روشنی محبت کی
بکھیرتا رہوں الفت کا نور آنکھوں میں

قریب اُس سے زیادہ نہیں کوئی راغبؔ
دِکھائی دے گا وہی دُور دوُر آنکھوں میں

تمام عمر نہ چن پائے کرچیاں راغبؔ
ہوا تھا خواب کوئی چُور چُور آنکھوں میں

مزید دکھائیں

افتخار راغب

تخلیقِ کارِ کلامِ دل پذیر، علمبردارِ توازنِ لفظ و معنی ، بدرِ آسمانِ شعر و سخنِ قطر اور افتخارِ بزمِ اردو قطر جناب افتخار راغبؔ کا تعلق ہندوستان کے صوبہ بہار سے ہے۔ پیشے سے سول انجنئیر ہیں اور 1998 میں جامعہ ملیہ اسلامیہ دہلی سے بی ٹیک کی ڈگری حاصل کرنے کے بعد مارچ 1999 سے قطر میں ملازمت کے سلسلے میں مقیم ہیں۔ آپ کے چار شعری مجموعۂ کلام، ’لفظوں میں احساس‘ ، ’خیال چہرہ‘ ، ’غزل درخت‘ اور 'یعنی تو' منظرِ عام پر آکر مقبولیت حاصل کر چکے ہیں۔ غزلوں کا پانچواں مجموعہ اور مزاحیہ شاعری کا پہلا مجموعہ زیرِ ترتیب ہیں۔ آپ کی شاعری کی اینڈرائڈ ایپ بھی بن چکی ہے جسے Google Play Store میں Iftekhar Raghib - Urdu Poetry لکھ کر تلاش کرکے انسٹال کیا جا سکتا ہے اس میں چاروں مجموعہ غزلیات دیدہ زیب انداز میں موجود ہیں. افتخار راغبؔ کا شمار قطر کے فعال ترین ادبی شخصیات میں ہوتا ہے۔ آپ قطر کی قدیم ترین اردو تنظیم بزمِ اردو قطر کے 2010 سے جنرل سکریٹری ہیں اور دیگر ادبی تنظیموں میں بھی پیش پیش رہتے ہیں۔ آپ اپنے پختہ کلام کے حوالے سے پوری اردو دنیا میں نئی نسل کے شعراء میں منفرد شناخت رکھتے ہیں۔

متعلقہ

Back to top button
Close