غزل

اک جھلک اور دکھاؤ نہ اگر ممکن ہو

فہم و ادارک میں آؤ نہ اگر ممکن ہو

افتخار راغبؔ

فہم و ادارک میں آؤ نہ اگر ممکن ہو

اک جھلک اور دکھاؤ نہ اگر ممکن ہو

حوض ہیں چشم تو رُخ پر ہے بہت آب و تاب

پیاس آنکھوں کی بجھاؤ نہ اگر ممکن ہو

طائرِ ربط میں سرخاب کے پر لگ جائیں

دستِ صد ناز بڑھاؤ نہ اگر ممکن ہو

چاہتا ہوں کہ نہ ہو درد کی شدت میں کمی

دل کو ہر روز دُکھاؤ نہ اگر ممکن ہو

اور کب تک رہے دیوار جھجک کی حائل

اب یہ دیوار گراؤ نہ اگر ممکن ہو

ایسا لگتا ہے کہ ہو جاؤں گا پتھر شاید

اک ذرا چھو کے دکھاؤ نہ اگر ممکن ہو

دیکھو کس طرح پڑا ہوں میں تمھارے در پر

دستِ الفت سے اٹھاؤ نہ اگر ممکن ہو

کچھ تو اعجاز دکھاؤ لبِ شیریں کا مجھے

میرا اک شعر سناؤ نہ اگر ممکن ہو

ہے سنورنے کا ارادہ تو تکلف کیسا

مجھ کو آئینہ بناؤ نہ اگر ممکن ہو

ایک دو گھونٹ بھی مل جائے تو خوش بختی ہے

شربتِ دید پلاؤ نہ اگر ممکن ہو

اور کب تک یوں ہی ڈھاؤ گے ستم رہ کر دور

دو بدو ہوکے ستاؤ نہ اگر ممکن ہو

میں کہ تالاب کے مانند ہوں تم شوخ پری

ایک کنکر ہی چلاؤ نہ اگر ممکن ہو

آس کے دیپ میں رکھتا ہوں ہمیشہ جگ مگ

تم کوئی آس بندھاؤ نہ اگر ممکن ہو

یوں ہی کب تک رہوں آخر میں حدِ رغبت میں

مجھ کو راغبؔ سے بڑھاؤ نہ اگر ممکن ہو

مزید دکھائیں

افتخار راغب

تخلیقِ کارِ کلامِ دل پذیر، علمبردارِ توازنِ لفظ و معنی ، بدرِ آسمانِ شعر و سخنِ قطر اور افتخارِ بزمِ اردو قطر جناب افتخار راغبؔ کا تعلق ہندوستان کے صوبہ بہار سے ہے۔ پیشے سے سول انجنئیر ہیں اور 1998 میں جامعہ ملیہ اسلامیہ دہلی سے بی ٹیک کی ڈگری حاصل کرنے کے بعد مارچ 1999 سے قطر میں ملازمت کے سلسلے میں مقیم ہیں۔ آپ کے چار شعری مجموعۂ کلام، ’لفظوں میں احساس‘ ، ’خیال چہرہ‘ ، ’غزل درخت‘ اور 'یعنی تو' منظرِ عام پر آکر مقبولیت حاصل کر چکے ہیں۔ غزلوں کا پانچواں مجموعہ اور مزاحیہ شاعری کا پہلا مجموعہ زیرِ ترتیب ہیں۔ آپ کی شاعری کی اینڈرائڈ ایپ بھی بن چکی ہے جسے Google Play Store میں Iftekhar Raghib - Urdu Poetry لکھ کر تلاش کرکے انسٹال کیا جا سکتا ہے اس میں چاروں مجموعہ غزلیات دیدہ زیب انداز میں موجود ہیں. افتخار راغبؔ کا شمار قطر کے فعال ترین ادبی شخصیات میں ہوتا ہے۔ آپ قطر کی قدیم ترین اردو تنظیم بزمِ اردو قطر کے 2010 سے جنرل سکریٹری ہیں اور دیگر ادبی تنظیموں میں بھی پیش پیش رہتے ہیں۔ آپ اپنے پختہ کلام کے حوالے سے پوری اردو دنیا میں نئی نسل کے شعراء میں منفرد شناخت رکھتے ہیں۔

متعلقہ

Back to top button
Close