غزل

ترے خیال سے نکلیں تو داستاں ہو جائیں

فوزیہ ربابؔ

ترے خیال سے نکلیں تو داستاں ہو جائیں

نصیب ہو جو ترا ساتھ، جاوداں ہو جائیں

ہماری راکھ اڑانے کو آئے گا وہ شخص

سو اس سے پہلے بھلا کیسے ہم دھواں ہو جائیں؟

تمہارے ملنے تلک قادر الکلام رہیں

تمہارے سامنے آئیں تو بے زباں ہو جائیں

ہمارا مسئلہ، دیکھو! ہمارا مسئلہ ہے!

یہ لوگ کس لیے اب اپنے درمیاں ہو جائیں

دلیل ہے ترے ہونے کی یہ ہمارا وجود

ترا نشاں بھی نہ ہو، ہم جو بے نشاں ہو جائیں

یقین ہے تمھیں اس وقت ہوش آئے گا

تمھاری چاہ میں جب یوں ہی رائگاں ہو جائیں

گماں ہمارا ہمیں راس ہی نہیں آتا

سو جی یہ چاہے کہ پھر تم سے بد گماں ہو جائیں

ہماری فکر میں نیندیں حرام ہوں اس کی

ہم اس کے واسطے اے کاش امتحاں ہو جائیں

وہ دور جائے تو لے جائے ہر خوشی میری

قریب آئے تو سب غم یہاں وہاں ہو جائیں

ہمارا ہاتھ ذرا آپ تھام کر رکھیے

کہیں حضور! نہ ہم گردِ کارواں ہو جائیں

ہمیں یہاں سے اٹھائے، اٹھیں یہاں سے ہم

جہاں جہاں وہ کہے ہم وہاں وہاں ہو جائیں

رباب جان بھی حاضر ہے اک اشارے پر

وہ ہم کو درد بھی دے دے  تو شادماں ہو جائیں

مزید دکھائیں

فوزیہ ربابؔ

نسوانی جذبات و احساسات کی پُر تاثیر عکاسی کرنے والی اور شاعری و نثر نگاری میں یکساں درک رکھنے والی منفرد لب و لہجہ کی شہزادیِ سخن محترمہ فوزیہ ربابؔ کا تعلق ہندوستان کے صوبہ گجرات کے دار الحکومت احمد آباد کے ایک معروف علمی و دینی گھرانے سے ہے. بچن ہی سے آپ کو شعر و ادب کے مطالعے کا شوق رہا ہے. آپ نے گجرات یونیورسی ٹی سے ایم اے اور بی ایڈ کی ڈگڑی حاصل کرنے کے بعد ماس کمیونیکیشن اینڈ جرنلجزم کی ڈگری بھی حاصل کی ہے. طالب علمی کے زمانے ہی سے شعر گوئی کی طرف راغب ہیں. شادی کے بعد 2010 سے گوا میں مقیم ہیں اور وہیں سے عالمی ادب میں اپنی منفرد اور معتبر شناخت قائم کرنے میں کامیابی حاصل کر چکی ہیں. سوشل میڈیا اور پرنٹ میڈیا کے مختلف ذرائع سے آپ کا کلام پوری اردو دنیا میں روز بروز مقبولیت حاصل کر رہا ہے. آپ متعدد ادبی تنظیموں اور رسالوں وغیرہ سے وابستہ ہیں. اتنی کم عمری ہی میں کئی ایوارڈ و اعزاز سے نوازی جا چکی ہیں نیز پاکستان میں بھی آپ کے اعزاز میں مشاعرہ منعقد ہوچکا ہے. ہندوستان کے متعدد معیاری عالمی و کل ہند مشاعروں میں با وقار و کامیاب شرکت کر چکی ہیں. آپ کی شاعری کا پہلا مجموعہ "آنکھوں کے اُس پار" اکتوبر 2017 میں عرشیہ پبلیکیشنز دہلی سے شائع ہو کر مقبولیت حاصل کر رہا ہے اور دوسرا مجموعہ زیرِ ترتیب ہے. آپ کی شاعری کی انتہائی دیدہ زیب اینڈرائڈ ایپ بھی تیار ہو چکی ہے جسے Play Store میں Foziya Rabab Poetry سے تلاش کر کے موبائیل میں انسٹال کر کے پڑھا جا سکتا ہے. آپ کی غزلیں جہاں احساسات و جذبات و دلکشی سے لبریز ہوتی ہیں وہیں آپ کی نظموں میں بلا کی روانی کے ساتھ زبان و بیان کی چاشنی اپنی الگ دل ربائی کی خوشبو لٹاتی ہے جن کو پڑھ کر قاری افکار و تخیل کی حسیں وادی میں گم سا ہو جاتا ہے.

متعلقہ

Close