غزل

تیری ضد اور اپنی وحشت سے ڈر رہا ہوں کہ کھو نہ دوں تجھ کو

جنگ پھر چھڑ گئی ہے قسمت سے ڈر رہا ہوں کہ کھو نہ دوں تجھ کو

افتخار راغب

تیری ضد اور اپنی وحشت سے ڈر رہا ہوں کہ کھو نہ دوں تجھ کو

جنگ پھر چھڑ گئی ہے قسمت سے ڈر رہا ہوں کہ کھو نہ دوں تجھ کو

 کیا کہا اب میں بھول جاؤں تجھے، اب تو ممکن نہیں یہ رہنے دے

سہمی سہمی تری ہدایت سے ڈر رہا ہوں کہ کھو نہ دو تجھ کو

 مہرباں مجھ پہ شومیِ قسمت، ٹوٹ جائے کہیں نہ اب ہمّت

تلخیِ زیست کی عنایت سے ڈر رہا ہوں کہ کھو نہ دوں تجھ کو

 دل نے بھی کشمکش کی ٹھانی ہے، غیر پر تیری مہربانی ہے

بدلی بدلی نگاہِ الفت سے ڈر رہا ہوں کہ کھو نہ دوں تجھ کو

روز درپیش اک نئی الجھن، چاک ہے صبر و ضبط کا دامن

لرزشِ پاے استقامت سے ڈر رہا ہوں کہ کھو نہ دوں تجھ کو

 دل نہ راغب ہو وسوسوں پہ کہیں، ڈھہہ نہ جائے کبھی یہ قصرِ یقیں

گردشِ وقت کی شرارت سے ڈر رہا ہوں کہ کھو نہ دوں تجھ کو

مزید دکھائیں

افتخار راغب

تخلیقِ کارِ کلامِ دل پذیر، علمبردارِ توازنِ لفظ و معنی ، بدرِ آسمانِ شعر و سخنِ قطر اور افتخارِ بزمِ اردو قطر جناب افتخار راغبؔ کا تعلق ہندوستان کے صوبہ بہار سے ہے۔ پیشے سے سول انجنئیر ہیں اور 1998 میں جامعہ ملیہ اسلامیہ دہلی سے بی ٹیک کی ڈگری حاصل کرنے کے بعد مارچ 1999 سے قطر میں ملازمت کے سلسلے میں مقیم ہیں۔ آپ کے چار شعری مجموعۂ کلام، ’لفظوں میں احساس‘ ، ’خیال چہرہ‘ ، ’غزل درخت‘ اور 'یعنی تو' منظرِ عام پر آکر مقبولیت حاصل کر چکے ہیں۔ غزلوں کا پانچواں مجموعہ اور مزاحیہ شاعری کا پہلا مجموعہ زیرِ ترتیب ہیں۔ آپ کی شاعری کی اینڈرائڈ ایپ بھی بن چکی ہے جسے Google Play Store میں Iftekhar Raghib - Urdu Poetry لکھ کر تلاش کرکے انسٹال کیا جا سکتا ہے اس میں چاروں مجموعہ غزلیات دیدہ زیب انداز میں موجود ہیں. افتخار راغبؔ کا شمار قطر کے فعال ترین ادبی شخصیات میں ہوتا ہے۔ آپ قطر کی قدیم ترین اردو تنظیم بزمِ اردو قطر کے 2010 سے جنرل سکریٹری ہیں اور دیگر ادبی تنظیموں میں بھی پیش پیش رہتے ہیں۔ آپ اپنے پختہ کلام کے حوالے سے پوری اردو دنیا میں نئی نسل کے شعراء میں منفرد شناخت رکھتے ہیں۔

متعلقہ

Close