غزل

ختم ہو جائے لڑائی بیچ میں

افتخار راغبؔ

ختم ہو جائے لڑائی بیچ میں

اِس لیے پڑتا ہوں بھائی بیچ میں

میں وطن میں فون کرتا رہ گیا

رہ گئی ساری کمائی بیچ میں

بھائی بھائی کو جھگڑتا دیکھ کر

آگیا دشمن کا بھائی بیچ میں

ڈھو رہا ہے کم سنی سے گھر کا بوجھ

چھوڑ کر اپنی پڑھائی بیچ میں

ہر طرف ہے تیری یادوں کا ہجوم

اور میری چارپائی بیچ میں

کر رہے ہو تم سفر سوئے بہشت

دیکھنا دنیا ہے بھائی بیچ میں

ساتھ چلنے کا تھا وعدہ عمر بھر

کر گیا وہ بے وفائی بیچ میں

چارہ گر سے کیوں ہے راغبؔ وہ خفا

چھوڑ دی جس نے دوائی بیچ میں

مزید دکھائیں

افتخار راغب

تخلیقِ کارِ کلامِ دل پذیر، علمبردارِ توازنِ لفظ و معنی ، بدرِ آسمانِ شعر و سخنِ قطر اور افتخارِ بزمِ اردو قطر جناب افتخار راغبؔ کا تعلق ہندوستان کے صوبہ بہار سے ہے۔ پیشے سے سول انجنئیر ہیں اور 1998 میں جامعہ ملیہ اسلامیہ دہلی سے بی ٹیک کی ڈگری حاصل کرنے کے بعد مارچ 1999 سے قطر میں ملازمت کے سلسلے میں مقیم ہیں۔ آپ کے چار شعری مجموعۂ کلام، ’لفظوں میں احساس‘ ، ’خیال چہرہ‘ ، ’غزل درخت‘ اور 'یعنی تو' منظرِ عام پر آکر مقبولیت حاصل کر چکے ہیں۔ غزلوں کا پانچواں مجموعہ اور مزاحیہ شاعری کا پہلا مجموعہ زیرِ ترتیب ہیں۔ آپ کی شاعری کی اینڈرائڈ ایپ بھی بن چکی ہے جسے Google Play Store میں Iftekhar Raghib - Urdu Poetry لکھ کر تلاش کرکے انسٹال کیا جا سکتا ہے اس میں چاروں مجموعہ غزلیات دیدہ زیب انداز میں موجود ہیں. افتخار راغبؔ کا شمار قطر کے فعال ترین ادبی شخصیات میں ہوتا ہے۔ آپ قطر کی قدیم ترین اردو تنظیم بزمِ اردو قطر کے 2010 سے جنرل سکریٹری ہیں اور دیگر ادبی تنظیموں میں بھی پیش پیش رہتے ہیں۔ آپ اپنے پختہ کلام کے حوالے سے پوری اردو دنیا میں نئی نسل کے شعراء میں منفرد شناخت رکھتے ہیں۔

ایک تبصرہ

  1. کیسے بتائیں حال دل اضطراب ہم
    ہم سے نہ پوچھئے ہمارے دل کا حال
    ساحل جمال سمستی پوری

متعلقہ

Close