غزل

دشتِ جُنوں میں دوڑتا پھرتا ہے اک غزال

مشکل ہے ذہن و دل کے عناصر میں اعتدال

افتخار راغبؔ

دشتِ جُنوں میں دوڑتا پھرتا ہے اک غزال

مشکل ہے ذہن و دل کے عناصر میں اعتدال

تجھ سا حسیں جہانِ تخیّل میں بھی کہاں

ممکن کہاں ہے ڈھونڈ کے لانا تری مثال

مضبوط اِس قدر ہو ہر اک آس کی لڑی

ڈر ٹوٹنے کا ہو نہ بکھرنے کا احتمال

مت پوچھ کیسے شعروں میں آتی ہے دل کشی

مت پوچھ کس کی چشمِ فسوں گر کا ہے کمال

جس کا جواب قلب گوارا نہ کر سکے

اُبھرے کبھی نہ ذہن میں ایسا کوئی سوال

اک دوسرے کے دل میں دھڑکتے رہیں سدا

تا عمر اعتماد کی سانسیں رہیں بحال

ہو جائے ہر ملال دسمبر کے ساتھ ختم

لے آئے جنوری کوئی مطلق خوشی کا سال

تعبیر اُس کے حسن و ادا کی ہو کیا بھلا

وہ پیکرِ جمال وہ دل دارِ خوش خصال

دیکھا ہر ایک عکس میں آنکھوں نے تیرا عکس

"ابھرا ہر اک خیال کی تہہ سے ترا خیال”

راغبؔ سمجھ کے شعر وہ دیتے رہیں گے داد

کیسے بیاں کروں دلِ مضطر کا اپنے حال

مزید دکھائیں

افتخار راغب

تخلیقِ کارِ کلامِ دل پذیر، علمبردارِ توازنِ لفظ و معنی ، بدرِ آسمانِ شعر و سخنِ قطر اور افتخارِ بزمِ اردو قطر جناب افتخار راغبؔ کا تعلق ہندوستان کے صوبہ بہار سے ہے۔ پیشے سے سول انجنئیر ہیں اور 1998 میں جامعہ ملیہ اسلامیہ دہلی سے بی ٹیک کی ڈگری حاصل کرنے کے بعد مارچ 1999 سے قطر میں ملازمت کے سلسلے میں مقیم ہیں۔ آپ کے چار شعری مجموعۂ کلام، ’لفظوں میں احساس‘ ، ’خیال چہرہ‘ ، ’غزل درخت‘ اور 'یعنی تو' منظرِ عام پر آکر مقبولیت حاصل کر چکے ہیں۔ غزلوں کا پانچواں مجموعہ اور مزاحیہ شاعری کا پہلا مجموعہ زیرِ ترتیب ہیں۔ آپ کی شاعری کی اینڈرائڈ ایپ بھی بن چکی ہے جسے Google Play Store میں Iftekhar Raghib - Urdu Poetry لکھ کر تلاش کرکے انسٹال کیا جا سکتا ہے اس میں چاروں مجموعہ غزلیات دیدہ زیب انداز میں موجود ہیں. افتخار راغبؔ کا شمار قطر کے فعال ترین ادبی شخصیات میں ہوتا ہے۔ آپ قطر کی قدیم ترین اردو تنظیم بزمِ اردو قطر کے 2010 سے جنرل سکریٹری ہیں اور دیگر ادبی تنظیموں میں بھی پیش پیش رہتے ہیں۔ آپ اپنے پختہ کلام کے حوالے سے پوری اردو دنیا میں نئی نسل کے شعراء میں منفرد شناخت رکھتے ہیں۔

متعلقہ

Close