غزل

سکوں کی سانس لینے کی میں خواہش بھی نہیں کرتا

سکوں کی آس کیا جب تک تجھے راضی نہیں کرتا

افتخار راغبؔ

سکوں کی سانس لینے کی میں خواہش بھی نہیں کرتا

سکوں کی آس کیا جب تک تجھے راضی نہیں کرتا

نہیں شکوہ کوئی اس سے فقط اک بات کہنی ہے

وہ ہے غم خوار گرچہ میری غم خواری نہیں کرتا

کسی کے ساتھ مل کر رچ رہی ہے زندگی سازش

وگرنہ میں کبھی یوں فکرِ پسپائی نہیں کرتا

کرم بخشو! نوازو مجھ کو تم جس طرح جی چاہے

تماشائے کرم کی میں کبھی گنتی نہیں کرتا

تجھے دیکھا ہے اچھی طرح سے اے عکسِ مستقبل

تری ہیبت اگرچہ خود پہ میں طاری نہیں کرتا

وہ رہ کر گلشنِ دل میں اگر رکھتا ہمارا دل

یقیناً طائرِ امّید کو زخمی نہیں کرتا

نہ ہوتا اس قدر خوش فہم جو تیرے تعلق سے

کبھی بھولے سے بھی اظہارِ خوش فہمی نہیں کرتا

حلاوت گھولنا جاری رہے گا میری جانب سے

میں جب تک دور اس کی فکر کی تلخی نہیں کرتا

نگہ میں بس گئی اک فاختہ جس روز سے راغبؔ

کسی چڑیا کی جانب دیکھنے کو جی نہیں کرتا

مزید دکھائیں

افتخار راغب

تخلیقِ کارِ کلامِ دل پذیر، علمبردارِ توازنِ لفظ و معنی ، بدرِ آسمانِ شعر و سخنِ قطر اور افتخارِ بزمِ اردو قطر جناب افتخار راغبؔ کا تعلق ہندوستان کے صوبہ بہار سے ہے۔ پیشے سے سول انجنئیر ہیں اور 1998 میں جامعہ ملیہ اسلامیہ دہلی سے بی ٹیک کی ڈگری حاصل کرنے کے بعد مارچ 1999 سے قطر میں ملازمت کے سلسلے میں مقیم ہیں۔ آپ کے چار شعری مجموعۂ کلام، ’لفظوں میں احساس‘ ، ’خیال چہرہ‘ ، ’غزل درخت‘ اور 'یعنی تو' منظرِ عام پر آکر مقبولیت حاصل کر چکے ہیں۔ غزلوں کا پانچواں مجموعہ اور مزاحیہ شاعری کا پہلا مجموعہ زیرِ ترتیب ہیں۔ آپ کی شاعری کی اینڈرائڈ ایپ بھی بن چکی ہے جسے Google Play Store میں Iftekhar Raghib - Urdu Poetry لکھ کر تلاش کرکے انسٹال کیا جا سکتا ہے اس میں چاروں مجموعہ غزلیات دیدہ زیب انداز میں موجود ہیں. افتخار راغبؔ کا شمار قطر کے فعال ترین ادبی شخصیات میں ہوتا ہے۔ آپ قطر کی قدیم ترین اردو تنظیم بزمِ اردو قطر کے 2010 سے جنرل سکریٹری ہیں اور دیگر ادبی تنظیموں میں بھی پیش پیش رہتے ہیں۔ آپ اپنے پختہ کلام کے حوالے سے پوری اردو دنیا میں نئی نسل کے شعراء میں منفرد شناخت رکھتے ہیں۔

متعلقہ

Close