غزل

شاخِ وحشت پہ برگ و بار نہیں

غم نہیں کوئی غم گسار نہیں

افتخار راغبؔ

شاخِ وحشت پہ برگ و بار نہیں

غم نہیں کوئی غم گسار نہیں

تجھ سے کیا دشمنی کا خوف مجھے

دوستوں میں ترا شمار نہیں

مہرباں گر نہیں نگاہِ کرم

کوئی موسم ہو سازگار نہیں

اک اشارے پہ دوڑ آؤں گا

زخم بھرنے کا انتظار نہیں

مجھ کو جتنی تھی اُن سے ہاں کی آس

اُن کے لب پر تھی اُتنی بار نہیں

کس کو اپنا جہاں نہیں محبوب

کس کو اپنی زمیں سے پیار نہیں

میں تو دل کی لگی کا مارا ہوں

دل لگی وجہِ انتشار نہیں

تیری باتوں میں کھو گئے ہیں ہم

اپنی آنکھوں پہ اعتبار نہیں

اب بھی دل کے لغت میں سب کچھ ہے

صرف اک حرفِ اختیار نہیں

میں محبت کا ہوں نمائندہ

بغض و نفرت مرا شعار نہیں

رُخ پہ ہر دم طمانیت کا عکس

شیشۂ قلب پر غبار نہیں

دیکھ کر آنکھ کیوں نہ بھر آئے

چشمِ بے کس ہے آبشار نہیں

حکم کس نے دیا تھا یہ بھی دیکھ

کس طرح کہتا خاکسار نہیں

جل رہا ہے حروف سے کاغذ

لکھ رہا ہوں کہ بے قرار نہیں

تیری آنکھوں سے ہے عیاں کچھ اور

توٗ زباں سے کہے ہزار نہیں

موند لیتے ہو آنکھ کیوں راغبؔ

کیا حقیقت سے یہ فرار نہیں

مزید دکھائیں

افتخار راغب

تخلیقِ کارِ کلامِ دل پذیر، علمبردارِ توازنِ لفظ و معنی ، بدرِ آسمانِ شعر و سخنِ قطر اور افتخارِ بزمِ اردو قطر جناب افتخار راغبؔ کا تعلق ہندوستان کے صوبہ بہار سے ہے۔ پیشے سے سول انجنئیر ہیں اور 1998 میں جامعہ ملیہ اسلامیہ دہلی سے بی ٹیک کی ڈگری حاصل کرنے کے بعد مارچ 1999 سے قطر میں ملازمت کے سلسلے میں مقیم ہیں۔ آپ کے چار شعری مجموعۂ کلام، ’لفظوں میں احساس‘ ، ’خیال چہرہ‘ ، ’غزل درخت‘ اور 'یعنی تو' منظرِ عام پر آکر مقبولیت حاصل کر چکے ہیں۔ غزلوں کا پانچواں مجموعہ اور مزاحیہ شاعری کا پہلا مجموعہ زیرِ ترتیب ہیں۔ آپ کی شاعری کی اینڈرائڈ ایپ بھی بن چکی ہے جسے Google Play Store میں Iftekhar Raghib - Urdu Poetry لکھ کر تلاش کرکے انسٹال کیا جا سکتا ہے اس میں چاروں مجموعہ غزلیات دیدہ زیب انداز میں موجود ہیں. افتخار راغبؔ کا شمار قطر کے فعال ترین ادبی شخصیات میں ہوتا ہے۔ آپ قطر کی قدیم ترین اردو تنظیم بزمِ اردو قطر کے 2010 سے جنرل سکریٹری ہیں اور دیگر ادبی تنظیموں میں بھی پیش پیش رہتے ہیں۔ آپ اپنے پختہ کلام کے حوالے سے پوری اردو دنیا میں نئی نسل کے شعراء میں منفرد شناخت رکھتے ہیں۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

متعلقہ

Back to top button
Close