غزل

فرطِ جذبات کا تھا مارا میں

اب ہوں ٹوٹا ہوا ستارہ میں

افتخار راغبؔ

فرطِ جذبات کا تھا مارا میں

اب ہوں ٹوٹا ہوا ستارہ میں

لمس تیرا سنوار دیتا تھا

جب بھی ہوتا تھا پارہ پارہ میں

ذہن اور دل میں اتفاق نہیں

کیسے سمجھوں ترا اشارہ میں

خود سے اُتنا ہی میں ہوا بے زار

جتنا لگتا تھا تجھ کو پیارا میں

بن ترے دن کہاں گزرتے تھے

کر رہا تھا فقط گزارا میں

کیسے ہو کر ترے خلاف کبھی

اپنے دل کا بنوں سہارا میں

روز غم سے ترے لڑائی کی

روز تیری خوشی سے ہارا میں

روز اٹھتی تھی دل میں ایک ہی ٹیٖس

روز کرتا تھا استخارہ میں

اب نہ دوں گا تمھیں کوئی تکلیف

ہو گیا خود پہ آشکارا میں

جانے کب چل گیا تمھارا سحر

جانے کب ہو گیا تمھارا میں

اُس نے پوچھا کہ کون راغبؔ ہے

کہہ دیا میں نے کتنا سارا "میں”

مزید دکھائیں

افتخار راغب

تخلیقِ کارِ کلامِ دل پذیر، علمبردارِ توازنِ لفظ و معنی ، بدرِ آسمانِ شعر و سخنِ قطر اور افتخارِ بزمِ اردو قطر جناب افتخار راغبؔ کا تعلق ہندوستان کے صوبہ بہار سے ہے۔ پیشے سے سول انجنئیر ہیں اور 1998 میں جامعہ ملیہ اسلامیہ دہلی سے بی ٹیک کی ڈگری حاصل کرنے کے بعد مارچ 1999 سے قطر میں ملازمت کے سلسلے میں مقیم ہیں۔ آپ کے چار شعری مجموعۂ کلام، ’لفظوں میں احساس‘ ، ’خیال چہرہ‘ ، ’غزل درخت‘ اور 'یعنی تو' منظرِ عام پر آکر مقبولیت حاصل کر چکے ہیں۔ غزلوں کا پانچواں مجموعہ اور مزاحیہ شاعری کا پہلا مجموعہ زیرِ ترتیب ہیں۔ آپ کی شاعری کی اینڈرائڈ ایپ بھی بن چکی ہے جسے Google Play Store میں Iftekhar Raghib - Urdu Poetry لکھ کر تلاش کرکے انسٹال کیا جا سکتا ہے اس میں چاروں مجموعہ غزلیات دیدہ زیب انداز میں موجود ہیں. افتخار راغبؔ کا شمار قطر کے فعال ترین ادبی شخصیات میں ہوتا ہے۔ آپ قطر کی قدیم ترین اردو تنظیم بزمِ اردو قطر کے 2010 سے جنرل سکریٹری ہیں اور دیگر ادبی تنظیموں میں بھی پیش پیش رہتے ہیں۔ آپ اپنے پختہ کلام کے حوالے سے پوری اردو دنیا میں نئی نسل کے شعراء میں منفرد شناخت رکھتے ہیں۔

متعلقہ

Back to top button
Close