غزل

لَوٹ رہے ہو ہاتھ چھڑا کر شہزادے

فوزیہ ربابؔ

لَوٹ رہے ہو ہاتھ چھڑا کر شہزادے

کیا ملتا ہے مجھ کو رُلا کر شہزادے

۔

بولو کیسے خود کو اب تم روکو گے

دل کی بے تابی کو بڑھا کر شہزادے

۔

کب تک اک اک لمحہ یوں ہی کاٹیں گے

دیواروں کو درد سنا کر شہزادے

۔

کتنا روئی کیا تجھ کو معلوم نہیں

آج میں تیرا ہجر منا کر شہزادے

۔

دیر تلک کیوں روٹھے روٹھے رہتے ہو

کیا ملتا ہے جان جلا کر شہزادے

۔

آج نکھار دیا ہے میری شب کا روپ

توٗ نے میرے خواب میں آ کر شہزادے

۔

اپنی آنکھوں کی قیمت نہ گرا لینا

ایسے میرا مول گھٹا کر شہزادے

۔

آج پتا ہے؟ میں نے پھر سے یاد کیا

تجھ کو کتنی بار بھلا کر شہزادے

۔

تم نے میری ہستی کو پامال کیا

میری ہر اک ضد کو مٹا کر شہزادے

۔

من کے نازک محل میں سخت اناؤں کی

کہاں گئے دیوار اُٹھا کر شہزادے

۔

پریم کی گنگا جمنا من میں بہا دی ناں

تم نے اپنے خواب دکھا کر شہزادے

۔

روپ سنوار کے تیری آس میں شہزادی

رستہ دیکھے سیج سجا کر شہزادے

۔

مجھ کو لگا لو آج پھر اپنے سینے سے

کان میں وہ اک بات بتا کر شہزادے

۔

بخت میں تیرا ساتھ میسّر ہو جائے

تو بھی سوہنے رب سے دعا کر شہزادے

۔

کس کو سنائے خاموشی کے بَین ربابؔ

دل روتا ہے درد چھپا کر شہزادے

مزید دکھائیں

فوزیہ ربابؔ

نسوانی جذبات و احساسات کی پُر تاثیر عکاسی کرنے والی اور شاعری و نثر نگاری میں یکساں درک رکھنے والی منفرد لب و لہجہ کی شہزادیِ سخن محترمہ فوزیہ ربابؔ کا تعلق ہندوستان کے صوبہ گجرات کے دار الحکومت احمد آباد کے ایک معروف علمی و دینی گھرانے سے ہے. بچن ہی سے آپ کو شعر و ادب کے مطالعے کا شوق رہا ہے. آپ نے گجرات یونیورسی ٹی سے ایم اے اور بی ایڈ کی ڈگڑی حاصل کرنے کے بعد ماس کمیونیکیشن اینڈ جرنلجزم کی ڈگری بھی حاصل کی ہے. طالب علمی کے زمانے ہی سے شعر گوئی کی طرف راغب ہیں. شادی کے بعد 2010 سے گوا میں مقیم ہیں اور وہیں سے عالمی ادب میں اپنی منفرد اور معتبر شناخت قائم کرنے میں کامیابی حاصل کر چکی ہیں. سوشل میڈیا اور پرنٹ میڈیا کے مختلف ذرائع سے آپ کا کلام پوری اردو دنیا میں روز بروز مقبولیت حاصل کر رہا ہے. آپ متعدد ادبی تنظیموں اور رسالوں وغیرہ سے وابستہ ہیں. اتنی کم عمری ہی میں کئی ایوارڈ و اعزاز سے نوازی جا چکی ہیں نیز پاکستان میں بھی آپ کے اعزاز میں مشاعرہ منعقد ہوچکا ہے. ہندوستان کے متعدد معیاری عالمی و کل ہند مشاعروں میں با وقار و کامیاب شرکت کر چکی ہیں. آپ کی شاعری کا پہلا مجموعہ "آنکھوں کے اُس پار" اکتوبر 2017 میں عرشیہ پبلیکیشنز دہلی سے شائع ہو کر مقبولیت حاصل کر رہا ہے اور دوسرا مجموعہ زیرِ ترتیب ہے. آپ کی شاعری کی انتہائی دیدہ زیب اینڈرائڈ ایپ بھی تیار ہو چکی ہے جسے Play Store میں Foziya Rabab Poetry سے تلاش کر کے موبائیل میں انسٹال کر کے پڑھا جا سکتا ہے. آپ کی غزلیں جہاں احساسات و جذبات و دلکشی سے لبریز ہوتی ہیں وہیں آپ کی نظموں میں بلا کی روانی کے ساتھ زبان و بیان کی چاشنی اپنی الگ دل ربائی کی خوشبو لٹاتی ہے جن کو پڑھ کر قاری افکار و تخیل کی حسیں وادی میں گم سا ہو جاتا ہے.

متعلقہ

Close