غزل

وجہِ وارفتگی ہے کیا سن لو

افتخار راغبؔ

وجہِ وارفتگی ہے کیا سن لو

مجھ میں گونجی ہے جو صدا سن لو

۔

 ہار جاؤ گے تم ستم ڈھا کر

پست ہوگا نہ حوصلہ سن لو

۔

میری آنکھیں بیان کرتی ہیں

کیوں مسلسل ہے رت جگا سن لو

۔

اے مرے بے خبر نہ ہو بے باک

بدبداتی ہے کیا ہوا سن لو

۔

کس سے منسوب ہیں مرے اشعار

لوگ کہتے ہیں مجھ کو کیا سن لو

۔

 تم نے آواز دی نگاہوں سے

دل سے پھوٹی ہے اک نوا سن لو

۔

میرے سایے میں بیٹھنے والو

قصۂ درد بھی مرا سن لو

۔

بد گمانی سے تھوڑا پھیر کے منھ

حال شہرِ گمان کا سن لو

۔

کیا ہے مجموعۂ جمال میں خاص

چشمِ راغبؔ کا تبصرہ سن لو

مزید دکھائیں

افتخار راغب

تخلیقِ کارِ کلامِ دل پذیر، علمبردارِ توازنِ لفظ و معنی ، بدرِ آسمانِ شعر و سخنِ قطر اور افتخارِ بزمِ اردو قطر جناب افتخار راغبؔ کا تعلق ہندوستان کے صوبہ بہار سے ہے۔ پیشے سے سول انجنئیر ہیں اور 1998 میں جامعہ ملیہ اسلامیہ دہلی سے بی ٹیک کی ڈگری حاصل کرنے کے بعد مارچ 1999 سے قطر میں ملازمت کے سلسلے میں مقیم ہیں۔ آپ کے چار شعری مجموعۂ کلام، ’لفظوں میں احساس‘ ، ’خیال چہرہ‘ ، ’غزل درخت‘ اور 'یعنی تو' منظرِ عام پر آکر مقبولیت حاصل کر چکے ہیں۔ غزلوں کا پانچواں مجموعہ اور مزاحیہ شاعری کا پہلا مجموعہ زیرِ ترتیب ہیں۔ آپ کی شاعری کی اینڈرائڈ ایپ بھی بن چکی ہے جسے Google Play Store میں Iftekhar Raghib - Urdu Poetry لکھ کر تلاش کرکے انسٹال کیا جا سکتا ہے اس میں چاروں مجموعہ غزلیات دیدہ زیب انداز میں موجود ہیں. افتخار راغبؔ کا شمار قطر کے فعال ترین ادبی شخصیات میں ہوتا ہے۔ آپ قطر کی قدیم ترین اردو تنظیم بزمِ اردو قطر کے 2010 سے جنرل سکریٹری ہیں اور دیگر ادبی تنظیموں میں بھی پیش پیش رہتے ہیں۔ آپ اپنے پختہ کلام کے حوالے سے پوری اردو دنیا میں نئی نسل کے شعراء میں منفرد شناخت رکھتے ہیں۔

متعلقہ

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

اسے بھی ملاحظہ فرمائیں

Close
Close