غزل

وہ اگر سلیقے سےگفتگو نہیں کرتا 

جمیل اخترشفیق

وہ اگرسلیقے سے  گفتگو نہیں کرتا

میں بھی اس سےملنے کی آرزو نہیں کرتا

دیکھ کر تجھےسب لوگ چپکے سے نکل جاتے

میں اگر  تعارف میں  کچھ   غُلو   نہیں  کرتا

جو  مجھے ضرورت  پر اجنبی سے  لگتے ہیں

میں بھی ایسے لوگوں کی جستجو نہیں کرتا

وہ مری خموشی کوبےبسی سمجھ لیتے

آئینہ    اگر   ان    کے  روبر   نہیں  کرتا

میں کہ روز قسطوں میں چاک ہوتا رہتا ہوں

چارہ گر  مجھے آکر   کیوں  رفو  نہیں  کرتا

انگلیاں شفیق ان پر کتنی اٹھ گئ ہوتیں

میں  اگر  نگاہوں  کو  باوضو  نہیں کرتا

مزید دکھائیں

جمیل اختر شفیق

جمیل اخترشفیق صاحب کا تعلق صوبہ بہار کے مشہور ضلع سیتامڑھی کے باجپٹی بلاک کی ایک انتہائ پسماندہ بستی سنڈوارہ سے ہے۔ آپ شاعری کے علاوہ ملک کے درجنوں اخبارات ورسائل کے لیے زمانۂ طالبِ علمی ہی سے کالم لکھتے آئے ہیں اور خوب پڑھے جاتے رہے ہیں۔ ساتھ ہی ملک بھر میں مختلف مذہبی، ادبی، سماجی موضوعات پہ منعقد ہونے والے پروگرام میں بھی ان کی شرکت ہوتی رہتی ہے، ملک کے قد آور شعراء کی موجودگی میں وہ درجنوں آل انڈیا مشاعروں کی تاریخ ساز نظامت بھی کر چکے ہیں اور ایک کامیاب ناظم کی حیثیت سے بھی اُن کی شخصیت بڑی تیزی سے ابھر رہی ہے۔ ممبئ سے نشر ہونے والا ٹیوی چینل "آئی پلس ٹیوی" جسے دنیا بھر میں تین کروڑ سے زیادہ لوگ دیکھتے ہیں اس پہ "رنگ ونور ایک دینی مشاعرہ" کے تحت نشر ہونے والے مشاعرے کی نظامت کرتے ہوئے بھی انہیں ناظرین ہر جمعہ کو دن میں 2.30بجے اور رات میں 7.30بجے متواتر دیکھ رہے ہیں جو کہ بلاشبہ صوبہ بہار کی ادبی دنیا کے لیے فخر کی بات ہے۔

متعلقہ

Close