غزل

پھر بڑھا دیں نہ پیچ و تاب سوال

مت کر اے عقل یوں جواب سوال

افتخار راغبؔ

پھر بڑھا دیں نہ پیچ و تاب سوال

مت کر اے عقل یوں جواب سوال

اُس نے پھر مسکرا کے ٹال دیا

ہو گئے پھر سے آب آب سوال

مطمئن ہو کے بیٹھنا ہے موت

کھولتے علم کے ہیں باب سوال

وہ ترا جرح تھا کہ خوشبو تھی

لگ رہے تھے مجھے گلاب سوال

دو بدو بے رُخی و بے تابی

اور لاتے گئے عذاب سوال

کوئی ملتا نہیں جواب اے دل

دردِ دل ہے کہ لا جواب سوال

اُن سے پوچھوں کہ کون ہے دل میں

اور ہو جائے باریاب سوال

کتنا اچھا ملا جواب اُسے

پھر نہ پوچھے گا وہ خراب سوال

ہے مخاطب تمھاری خاموشی

اور بڑھاتے ہیں اضطراب سوال

میں نے پوچھی تھی خیریت راغبؔ

ہو گیا باعثِ عتاب سوال

اُس کے ہونٹوں پہ کچھ نہیں راغبؔ

اُس کی آنکھوں میں بے حساب سوال

مزید دکھائیں

افتخار راغب

تخلیقِ کارِ کلامِ دل پذیر، علمبردارِ توازنِ لفظ و معنی ، بدرِ آسمانِ شعر و سخنِ قطر اور افتخارِ بزمِ اردو قطر جناب افتخار راغبؔ کا تعلق ہندوستان کے صوبہ بہار سے ہے۔ پیشے سے سول انجنئیر ہیں اور 1998 میں جامعہ ملیہ اسلامیہ دہلی سے بی ٹیک کی ڈگری حاصل کرنے کے بعد مارچ 1999 سے قطر میں ملازمت کے سلسلے میں مقیم ہیں۔ آپ کے چار شعری مجموعۂ کلام، ’لفظوں میں احساس‘ ، ’خیال چہرہ‘ ، ’غزل درخت‘ اور 'یعنی تو' منظرِ عام پر آکر مقبولیت حاصل کر چکے ہیں۔ غزلوں کا پانچواں مجموعہ اور مزاحیہ شاعری کا پہلا مجموعہ زیرِ ترتیب ہیں۔ آپ کی شاعری کی اینڈرائڈ ایپ بھی بن چکی ہے جسے Google Play Store میں Iftekhar Raghib - Urdu Poetry لکھ کر تلاش کرکے انسٹال کیا جا سکتا ہے اس میں چاروں مجموعہ غزلیات دیدہ زیب انداز میں موجود ہیں. افتخار راغبؔ کا شمار قطر کے فعال ترین ادبی شخصیات میں ہوتا ہے۔ آپ قطر کی قدیم ترین اردو تنظیم بزمِ اردو قطر کے 2010 سے جنرل سکریٹری ہیں اور دیگر ادبی تنظیموں میں بھی پیش پیش رہتے ہیں۔ آپ اپنے پختہ کلام کے حوالے سے پوری اردو دنیا میں نئی نسل کے شعراء میں منفرد شناخت رکھتے ہیں۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

متعلقہ

Close