غزل

کیا عشق ہے جب ہو جائے گا، تب بات سمجھ میں آئے گی

افتخار راغبؔ

کیا عشق ہے جب ہو جائے گا، تب بات سمجھ میں آئے گی

جب ذہن کو دل سمجھائے گا، تب بات سمجھ میں آئے گی

 پل میں خوش پل میں رنجیدہ، آئے نہ سمجھ میں بات ہے کیا

دل کھِل کھِل کر مرجھائے گا، تب بات سمجھ میں آئے گی

گُم صُم رہنے کا کیا ہے سبب، ہنستا ہے اکیلے میں کوئی کب

جب کوئی دل کو چُرائے گا، تب بات سمجھ میں آئے گی

میں اوروں کو سمجھاتا تھا، اے عشق مجھے معلوم نہ تھا

جب کچھ نہ سمجھ میں آئے گا، تب بات سمجھ میں آئے گی

کیا آفت دل کا آنا ہے، بے سود ابھی سمجھانا ہے

دل تڑپے گا تڑپائے گا، تب بات سمجھ میں آئے گی

چھُپ چھُپ کر دل کیوں روتا ہے، کیا عالمِ وحشت ہوتا ہے

رہ رہ کر جی گھبرائے گا، تب بات سمجھ میں آئے گی

کیا شے ہے محبت کی خوشبو، آتا ہے نظر کوئی کیوں ہر سوٗ

آنکھوں میں کوئی بس جائے گا، تب بات سمجھ میں آئے گی

راغبؔ مت پوچھ ہے رغبت کیا، اظہارِ محبت کیا ہے بلا

اک لفظ نہ منھ تک آئے گا، تب بات سمجھ میں آئے گی

مزید دکھائیں

افتخار راغب

تخلیقِ کارِ کلامِ دل پذیر، علمبردارِ توازنِ لفظ و معنی ، بدرِ آسمانِ شعر و سخنِ قطر اور افتخارِ بزمِ اردو قطر جناب افتخار راغبؔ کا تعلق ہندوستان کے صوبہ بہار سے ہے۔ پیشے سے سول انجنئیر ہیں اور 1998 میں جامعہ ملیہ اسلامیہ دہلی سے بی ٹیک کی ڈگری حاصل کرنے کے بعد مارچ 1999 سے قطر میں ملازمت کے سلسلے میں مقیم ہیں۔ آپ کے چار شعری مجموعۂ کلام، ’لفظوں میں احساس‘ ، ’خیال چہرہ‘ ، ’غزل درخت‘ اور 'یعنی تو' منظرِ عام پر آکر مقبولیت حاصل کر چکے ہیں۔ غزلوں کا پانچواں مجموعہ اور مزاحیہ شاعری کا پہلا مجموعہ زیرِ ترتیب ہیں۔ آپ کی شاعری کی اینڈرائڈ ایپ بھی بن چکی ہے جسے Google Play Store میں Iftekhar Raghib - Urdu Poetry لکھ کر تلاش کرکے انسٹال کیا جا سکتا ہے اس میں چاروں مجموعہ غزلیات دیدہ زیب انداز میں موجود ہیں. افتخار راغبؔ کا شمار قطر کے فعال ترین ادبی شخصیات میں ہوتا ہے۔ آپ قطر کی قدیم ترین اردو تنظیم بزمِ اردو قطر کے 2010 سے جنرل سکریٹری ہیں اور دیگر ادبی تنظیموں میں بھی پیش پیش رہتے ہیں۔ آپ اپنے پختہ کلام کے حوالے سے پوری اردو دنیا میں نئی نسل کے شعراء میں منفرد شناخت رکھتے ہیں۔

متعلقہ

Back to top button
Close