غزل

ہم مسافر ہیں جہاں چاہیں ٹھہر جاتے ہیں 

 ٹھوکریں ملتی ہیں ہرسمت، جدھر جاتے ہیں

جمیل اخترشفیق

 ہم مسا فر  ہیں جہاں  چاہیں ٹھہر جاتے ہیں

 ٹھوکریں ملتی ہیں ہرسمت، جدھر جاتے ہیں

میں تو دیوانہ طبیعت ہوں مجھےکیامعلوم

حادثے کتنے مر ے سر  سے  گزر  جاتے ہیں

جانے کس عہد میں بھیجا ہے خدانے مجھ کو

لوگ جینے  کے  تصور   سے  ہی مر جا تے ہیں

کیسی وحشت کا  تسلط  ہے  مرے  بچوں پر

رات کیاصبح کو بھی خواب میں ڈرجاتےہیں

لوگ  کہتے  ہیں  جنہیں  اپنے  زمانے  کا  ولی

وہ بھی میخانے سے ہوتے ہوئے گھر جاتے ہیں

کتنی نازک ہےشفیق ان کی طبیعت مت پوچھ

گرکے شیشے کی طرح پل میں بکھر  جاتے ہیں

مزید دکھائیں

جمیل اختر شفیق

جمیل اخترشفیق صاحب کا تعلق صوبہ بہار کے مشہور ضلع سیتامڑھی کے باجپٹی بلاک کی ایک انتہائ پسماندہ بستی سنڈوارہ سے ہے۔ آپ شاعری کے علاوہ ملک کے درجنوں اخبارات ورسائل کے لیے زمانۂ طالبِ علمی ہی سے کالم لکھتے آئے ہیں اور خوب پڑھے جاتے رہے ہیں۔ ساتھ ہی ملک بھر میں مختلف مذہبی، ادبی، سماجی موضوعات پہ منعقد ہونے والے پروگرام میں بھی ان کی شرکت ہوتی رہتی ہے، ملک کے قد آور شعراء کی موجودگی میں وہ درجنوں آل انڈیا مشاعروں کی تاریخ ساز نظامت بھی کر چکے ہیں اور ایک کامیاب ناظم کی حیثیت سے بھی اُن کی شخصیت بڑی تیزی سے ابھر رہی ہے۔ ممبئ سے نشر ہونے والا ٹیوی چینل "آئی پلس ٹیوی" جسے دنیا بھر میں تین کروڑ سے زیادہ لوگ دیکھتے ہیں اس پہ "رنگ ونور ایک دینی مشاعرہ" کے تحت نشر ہونے والے مشاعرے کی نظامت کرتے ہوئے بھی انہیں ناظرین ہر جمعہ کو دن میں 2.30بجے اور رات میں 7.30بجے متواتر دیکھ رہے ہیں جو کہ بلاشبہ صوبہ بہار کی ادبی دنیا کے لیے فخر کی بات ہے۔

متعلقہ

Close