نظم

آئی ہے آج لے کے خوشی کا پیام عید

رمضان کا ہمارے لئے ہے انعام عید

احمد علی برقیؔ اعظمی

آئی ہے آج لے کے خوشی کا پیام عید
رمضان کا ہمارے لئے ہے انعام عید

سب کے لئے ہے قابلِ صد احترام عید
دیتی ہے سب کو حسنِ عمل کا پیام عید

روزہ نشاطِ روح کا سامان ہے ، مگر
سب کے لئے ہے بادۂ عشرت کا جام عید

یہ از روئے اصولِ صحت بھی مفید ہے
حفظان صحت کا ہے مکمل نظام عید

رمضان ضبطِ نفس کا اک امتحان ہے
در اصل ہے نتیجۂ ماہِ صیام عید

بچے جوان بوڑھے سبھی شادکام ہیں
اُن کے لئے ہے جشن کا اک اہتمام عید

جن کو نہیں تھی لذتِ کام و دہن نصیب
برقیؔ ہے آج اُن کے لئے فیضِ عام عید

مزید دکھائیں

احمد علی برقی اعظمی

ڈاکٹر احمد علی برقیؔ اعظمی اعظم گڑھ کے ایک ادبی خانوادے سے تعلق رکھتے ہیں۔ آپ کے والد ماجد جناب رحمت الہی برقؔ دبستان داغ دہلوی سے وابستہ تھے اور ایک باکمال استاد شاعر تھے۔ برقیؔ اعظمی ان دنوں آل آنڈیا ریڈیو میں شعبہ فارسی کے عہدے سے سبکدوش ہونے کے بعد اب بھی عارضی طور سے اسی شعبے سے وابستہ ہیں۔۔ فی البدیہہ اور موضوعاتی شاعری میں آپ کو ملکہ حاصل ہے۔ آپ کی خاص دل چسپیاں جدید سائنس اور ٹکنالوجی خصوصاً اردو کی ویب سائٹس میں ہے۔ اردو و فارسی میں یکساں قدرت رکھتے ہیں۔ روحِ سخن آپ کا پہلا مجموعہ کلام ہے۔

متعلقہ

Close