نظم

اسلام کی عظمت کا نشاں ہے قرآن

احمد علی برقیؔ اعظمی

اسلام کی عظمت کا نشاں ہے قرآن

عرفان کی اک جوئے رواں ہے قرآن

آیا ہے جو سب توڑ کے باطل کے طلسم

توحید کی وہ روحِ رواں ہے قرآن

ہے عدل و مساوات پہ مبنی جو نظام

اُس نظم کا پیغام رساں ہے قرآن

مشرک کے لئے ہے یہ ہدایت کا پیام

مومن کے لئے تاب و تواں ہے قرآن

سرچشمہٌ ایمان و یقیں ہے یہ کتاب

اک گنجِ نہاں اور عیاں ہے قرآن

سائنس کی تائید ہے اس کو حاصل

فیضان خدا کا ہے جہاں ہے قرآن

اسرارِ ازل کا ہے یہ مظہر برقیؔ

قاری کے لئے فیض رساں ہے قرآن

مزید دکھائیں

احمد علی برقی اعظمی

ڈاکٹر احمد علی برقیؔ اعظمی اعظم گڑھ کے ایک ادبی خانوادے سے تعلق رکھتے ہیں۔ آپ کے والد ماجد جناب رحمت الہی برقؔ دبستان داغ دہلوی سے وابستہ تھے اور ایک باکمال استاد شاعر تھے۔ برقیؔ اعظمی ان دنوں آل آنڈیا ریڈیو میں شعبہ فارسی کے عہدے سے سبکدوش ہونے کے بعد اب بھی عارضی طور سے اسی شعبے سے وابستہ ہیں۔۔ فی البدیہہ اور موضوعاتی شاعری میں آپ کو ملکہ حاصل ہے۔ آپ کی خاص دل چسپیاں جدید سائنس اور ٹکنالوجی خصوصاً اردو کی ویب سائٹس میں ہے۔ اردو و فارسی میں یکساں قدرت رکھتے ہیں۔ روحِ سخن آپ کا پہلا مجموعہ کلام ہے۔

متعلقہ

Back to top button
Close