نظم

سال نو سب کے لیے ہو سازگار

لائے باغِ زندگی میں یہ بہار

احمد علی برقیؔ اعظمی

سال نو سب کے لئے ہو سازگار

لائے باغِ زندگی میں یہ بہار

سب کے ہوں شرمندۂ تعبیر خواب

ہو مساعد گردشِ لیل و نہار

ہو جہانِ رنگ و بو سب کے لئے

امن و صلح و آشتی سے ہمکنار

کس کی آخر لگ گئی ہم کو نظر

دامنِ انسانیت ہے تار تار

قلبِ مضطر مضمحل ہے آج کل

آتے آتے اس کو آئے گا قرار

آئیے مِل جل کے ہم آگے بڑھیں

زندگی کا ماحصل ہے صرف پیار

وہ جو ہیں سود و زیاں سے بے نیاز

اُن کا ہے حسنِ عمل برقیؔ شعار

مزید دکھائیں

احمد علی برقی اعظمی

ڈاکٹر احمد علی برقیؔ اعظمی اعظم گڑھ کے ایک ادبی خانوادے سے تعلق رکھتے ہیں۔ آپ کے والد ماجد جناب رحمت الہی برقؔ دبستان داغ دہلوی سے وابستہ تھے اور ایک باکمال استاد شاعر تھے۔ برقیؔ اعظمی ان دنوں آل آنڈیا ریڈیو میں شعبہ فارسی کے عہدے سے سبکدوش ہونے کے بعد اب بھی عارضی طور سے اسی شعبے سے وابستہ ہیں۔۔ فی البدیہہ اور موضوعاتی شاعری میں آپ کو ملکہ حاصل ہے۔ آپ کی خاص دل چسپیاں جدید سائنس اور ٹکنالوجی خصوصاً اردو کی ویب سائٹس میں ہے۔ اردو و فارسی میں یکساں قدرت رکھتے ہیں۔ روحِ سخن آپ کا پہلا مجموعہ کلام ہے۔

متعلقہ

Close