نظم

عالمی یوم انسدادِ تمباکو نوشی کی مناسبت سے ایک موضوعاتی نظم

ڈاکٹر احمد علی برقیؔ اعظمی

ہے ضروری ’’نو ٹوبیکو ڈے‘‘ پہ اس کا احتساب
ہے صحت پر کس قدر سیگار نوشی کا عتاب

کوئی ہے سرطان اور کوئی تنفس کا شکار
اور اِلرجی نے کسی کا کردیا جینا عذاب

جان کر بھی لوگ ہیں انجان کس سے کیا کہیں
جانے کب ہوگا جہاں سے اِس بَلا کا سدِباب

ڈبلیو ایچ او کررہی ہے کام اپنا اور ہم
اپنے ہاتھوں کررہے ہیں زندگی اپنی خراب

جُھک گئی فَرطِ نقاہت سے جوانی میں کمر
بحرِ ہستی میں ہے ان کی زندگی جیسے حباب

تاجروں کو اس کا حاصل ہے ضروری لائسنس
اور جو حساس ہیں ان کو ہے اس سے اضطراب

ہو گئی ہو جیسے ٹی بی اس قدر لاغر ہے جسم
ضُعف اتنا ہے کہ برقیؔ کھا رہے ہیں پیچ وتاب

مزید دکھائیں

احمد علی برقی اعظمی

ڈاکٹر احمد علی برقیؔ اعظمی اعظم گڑھ کے ایک ادبی خانوادے سے تعلق رکھتے ہیں۔ آپ کے والد ماجد جناب رحمت الہی برقؔ دبستان داغ دہلوی سے وابستہ تھے اور ایک باکمال استاد شاعر تھے۔ برقیؔ اعظمی ان دنوں آل آنڈیا ریڈیو میں شعبہ فارسی کے عہدے سے سبکدوش ہونے کے بعد اب بھی عارضی طور سے اسی شعبے سے وابستہ ہیں۔۔ فی البدیہہ اور موضوعاتی شاعری میں آپ کو ملکہ حاصل ہے۔ آپ کی خاص دل چسپیاں جدید سائنس اور ٹکنالوجی خصوصاً اردو کی ویب سائٹس میں ہے۔ اردو و فارسی میں یکساں قدرت رکھتے ہیں۔ روحِ سخن آپ کا پہلا مجموعہ کلام ہے۔

متعلقہ

Close