نظم

عید قرباں جذبۂ ایثار کا اظہار ہے

یہ اطاعت کا خلیل اللہ کی معیار ہے

ڈاکٹر احمد علی برقی اعظمی

عید قرباں جذبۂ ایثار کا اظہار ہے
یہ اطاعت کا خلیل اللہ کی معیار ہے

ہے یہ تسلیم و رضا کی ایک لافانی مثال
جان دینے کے لئے فرزند بھی تیار ہے

باپ کا حُسنِ عمل بیٹے کا ذوقِ اتباع
اِس مثالی داستاں کا مرکزی کردار ہے

خانۂ کعبہ جہاں ہے اہلِ ایماں کا ہجوم
وہ مقدس سرزمیں اِک مطلعِ انوار ہے

حجِ بیت اللہ کی جس کو سعادت ہے نصیب
فضلِ حق سے اُس کی راہِ مغفرت ہموار ہے

ہے یہ تاریخی حقیقت زیبِ تاریخِ جہاں
آگ بھی معمار کعبہ کے لئے گلزارہے

ہیں سبھی ارکانِ حج جانبخش برقیؔ اعظمی
اِس حقیقت سے بھلا کس شخص کو انکار ہے

مزید دکھائیں

احمد علی برقی اعظمی

ڈاکٹر احمد علی برقیؔ اعظمی اعظم گڑھ کے ایک ادبی خانوادے سے تعلق رکھتے ہیں۔ آپ کے والد ماجد جناب رحمت الہی برقؔ دبستان داغ دہلوی سے وابستہ تھے اور ایک باکمال استاد شاعر تھے۔ برقیؔ اعظمی ان دنوں آل آنڈیا ریڈیو میں شعبہ فارسی کے عہدے سے سبکدوش ہونے کے بعد اب بھی عارضی طور سے اسی شعبے سے وابستہ ہیں۔۔ فی البدیہہ اور موضوعاتی شاعری میں آپ کو ملکہ حاصل ہے۔ آپ کی خاص دل چسپیاں جدید سائنس اور ٹکنالوجی خصوصاً اردو کی ویب سائٹس میں ہے۔ اردو و فارسی میں یکساں قدرت رکھتے ہیں۔ روحِ سخن آپ کا پہلا مجموعہ کلام ہے۔

متعلقہ

Close