افسانہ

بجوکا

شین زاد

ﻭﻗﺖ ﮔﺰﺭﺗﺎ ﺭﮨﺘﺎ ﮨﮯ ……..
ﻭﻗﺖ ﺟﺲ ﮐﯽ ﭼﺎﭖ ﺧﺎﻣﻮﺵ، ﺟﺲ ﮐﺎ ﺳﻔﺮ ﻣﺴﻠﺴﻞ ﺍﻭﺭ ﺟﺲ ﮐﮯ ﻧﻘﻮﺵ ﺍﻥ ﻣﭧ ﮨﯿﮟ۔
ﻣﯿﺮﺍ ﮨﺮ ﭘﻞ ﯾﮩﯽ ﺳﻮﭺ ﮐﺮ ﮔﺰﺭﺗﺎ ﮨﮯ ﮐﮧ ﺷﺎﯾﺪ ﺁﺝ ﮐﺎ ﺩﻥ ﻣﯿﺮﯼ ﻧﺠﺎﺕ ﮐﺎ ﺩﻥ ﮨﻮ.
ﻣﯿﺮﯼ ﻧﮕﺎﮨﯿﮟ ﺩﻭﺭ ﺍﺱ ﻣﯿﺪﺍﻥ ﭘﺮ ﺟﻤﯽ ﺭﮨﺘﯽ ﮨﯿﮟ ﺟﺴﮯ ﻣﯿﮟ ﻧﮯ ﺟﺎﻧﮯ ﮐﺘﻨﯽ ﺻﺪﯾﻮﮞ ﯾﻮﮞ ﺩﯾﮑﮭﺎ ﮨﮯ ﺟﯿﺴﮯ ﮐﻮﺋﯽ ﭼﭩﺎﻥ ﮐﺴﯽ ﻭﺍﺩﯼ ﮐﻮ ﺩﯾﮑﮭﺘﯽ ﮨﮯ۔ ﺍﭘﻨﯽ ﮨﯽ ﺟﺎ ﺍِﺳﺘﺎﺩﮦ ﺍُﮐﮭﮍ ﺟﺎﻧﮯ ﮐﯽ ﺷﺪﯾﺪ ﺧﻮﺍﮨﺶ ﺍﭘﻨﮯ ﻣﻦ ﻣﯿﮟ ﻟﯿﮯ. ﻣﺮﮮ ﺍﺭﺩ ﮔﺮﺩ ﮨﻨﺴﺘﯽ ﺑﺎﻟﯿﺎﮞ ﻟﮩﻼﺗﯽ ﺭﮨﺘﯽ ﮨﯿﮟ ﻃﺮﺡ ﻃﺮﺡ ﮐﮯ ﭘﮭﻞ ﺍُﮔﺘﮯ ﮨﯿﮟ، ﺣﺴﯿﮟ ﭘﮭﻮﻝ ﺍﻭﺭ ﭘﻮﺩﮮ ﺑﺪﻟﺘﯽ ﺭﺗﻮﮞ ﻣﯿﮟ ﮨﺰﺍﺭ ﺭﻧﮕﻮﮞ ﮐﮯ ﺁﺋﯿﻨﮯ ﺑﺪﻟﺘﮯ ﺭﮨﺘﮯ ﮨﯿﮟ ﺍﻭﺭ ﻣﯿﮟ ﺍﭘﻨﯽ ﮨﯽ ﺟﺎ ﮔﮍﺍ ﺻﺒﺢ ﻭ ﺷﺎﻡ ﯾﮧ ﺳﺐ ﺩﯾﮑﮭﺘﺎ ﺭﮨﺘﺎ ﮨﻮﮞ، ﺟﮭﯿﻠﺘﺎ ﺭﮨﺘﺎ ﮨﻮﮞ ﻣﮕﺮ ﻣﯿﮟ ﮐﭽﮫ ﮐﮩﮧ ﻧﮩﯿﮟ ﺳﮑﺘﺎ ﮐﮧ ﻣﯿﺮﮮ ﭼﮩﺮﮮ ﭘﺮ ﻣﻨﮧ ﻧﮩﯿﮟ ﮨﮯ ﺑﺲ ﮐﺎﻥ ﮨﯿﮟ ﺍﻭﺭ ﺁﻧﮑﮭﯿﮟ ﮨﯿﮟ، ﺗﻘﺪﯾﺮ ﮐﺎ ﯾﮧ ﭘﮩﻼ ﺟﺒﺮ ﮨﮯ ﺟﻮ ﺍﺱ ﻧﮯ ﻣﺠھ ﭘﺮ ﺭﻭﺍ ﺭﮐﮭﺎ ﮨﮯ ﺍﻭﺭ ﺟﺒﺮ ﮐﺎ ﺍﯾﮏ ﻻﻣﺘﻨﺎﮨﯽ ﺳﻠﺴﻠﮧ ﺍﺱ ﮐﮯ ﭘﯿﭽﮭﮯ ﮨﮯ۔ ﯾﮧ ﻟﮩﮑﺘﯽ ﮈﺍﻟﯿﺎﮞ ﻣجھ ﺳﮯ ﺳﺮﮔﻮﺷﯽ ﻣﯿﮟ ﺑﮩﺖ ﮐچھ ﮐﮩﮧ ﺟﺎﺗﯽ ﮨﯿﮟ ﯾﮧ ﭘﮭﻞ ﻣجھ ﭘﺮ ﺟﮭﮏ ﮐﺮ ﻣﺠﮭﮯ ﺑﻮﺳﮯ ﺩﯾﺘﮯ ﺭﮨﺘﮯ ﮨﯿﮟ ﮐﺒﮭﯽ ﮐﺒﮭﯽ ﮐﻮﺋﯽ ﺍﯾﮏ ﺁﺩﮪ ﭘﮭﻮﻝ ﺍﭘﻨﯽ ﮐﮩﺎﻧﯽ ﺑﮭﯽ ﺳﻨﺎ ﺟﺎﺗﺎ ﮨﮯ ﻣﯿﮟ ﺳﺐ ﺳﻨﺘﺎ ﺭﮨﺘﺎ ﮨﻮﮞ ﻣﮕﺮ ﮐچھ ﮐﮩﮧ ﻧﮩﯿﮟ ﭘﺎﺗﺎ، ﺑﮭﻠﮯ ﺁﻧﺪﮬﯽ ﻃﻮﻓﺎﻥ ﺁﺋﮯ، ﺑﺎﺭﺷﯿﮟ ﮨﻮﮞ، ﺩﮬﻮﭖ ﻣﯿﺮﺍ ﭼﮩﺮﮦ ﺟﻼﺋﮯ ﺧﺰﺍﺋﯿﮟ ﺍﺗﺮﯾﮟ ﯾﺎ ﺑﮩﺎﺭﯾﮟ ﺑﯿﺘﯿﮟ ﻣﯿﺮﮮ ﻟﯿﮯ ﺳﺐ ﮐچھ ﺍﯾﮏ ﺟﯿﺴﺎ ﮨﮯ ﭼﺎﮨﮯ ﮐﭽھ ﺑﮭﯽ ﮨﻮ ﻣﯿﮟ ﺍﭘﻨﯽ ﮨﯽ ﺟﺎ ﺟﻤﮯ ﮐﮭﮍﮮ ﺭﮨﻨﮯ ﭘﺮ ﻣﺠﺒﻮﺭ ﺑﮭﯽ ﮨﻮﮞ ﺍﻭﺭ ﻣﻌﻤﻮﺭ ﺑﮭﯽ . ﭘﮭﻞ ﭘﮭﻮﻝ ﭘﺘﮯ ﭘﯿﮍ ﺳﺐ ﺍﮔﺘﮯ ﺍُﮐﮭﮍﺗﮯ ﮨﯿﮟ، ﻣﻮﺳﻢ ﺁﺗﮯ ﺟﺎﺗﮯ ﮨﯿﮟ، ﺟﺎﻧﺪﺍﺭ ﺟﯿﺘﮯ ﻣﺮﺗﮯ ﮨﯿﮟ ﮐﮧ ﯾﮧ ﺍﻧﮩﯿﮟ ﻭﺩﯾﻌﺖ ﮨﮯ ﭘﺮ ﻣﯿﮟ ﺟﻮ ﺳﺎﻝ ﮨﺎ ﺳﺎﻝ ﺳﮯ ( ﺍﺏ ﺗﻮ ﯾﮧ ﺑﮭﯽ ﯾﺎﺩ ﻧﮩﯿﮟ ﮐﺘﻨﮯ ﻗﺮﻧﻮﮞ ﺳﮯ ) ﺍﯾﮏ ﺟﺎ ﮔﮍﺍ ﮨﻮﺍ ﮨﻮﮞ ﺍﮐﺜﺮ ﺳﻮﭼﺘﺎ ﮨﻮﮞ ﮐﮧ ﺁﺧﺮ ﻣﺠﮭﮯ ﺍُﮐﮭﺎﮌﺍ ﮐﯿﻮﮞ ﻧﮩﯿﮟ ﺟﺎﺗﺎ؟ ﯾﮧ ﺍﮐﮭﺎﮌﮮ ﺟﺎﻧﮯ ﮐﯽ ﺷﺪﯾﺪ ﺧﻮﺍﮨﺶ ﻣﺮﮮ ﺳﯿﻨﮯ ﻣﯿﮟ ﺩﮨﻘﺎﻥ ﮐﮯ ﮨﺎتھ ﮐﮯ ﭨﮭُﮑﮯ ﺍﺱ ﮐﯿﻞ ﮐﯽ ﻃﺮﺡ ﮨﮯ ﺟﺲ ﮐﯽ ﭼﺒﮪﻦ ﺍﮐﮭﺎﮌﮮ ﺟﺎﻧﮯ ﺗﮏ ﺳﯿﻨﮯ ﺳﮯ ﻧﮩﯿﮟ ﺟﺎﺗﯽ۔
ﻭﻗﺖ ﮔﺰﺭﺗﺎ ﺭﮨﺘﺎ ﮨﮯ ………
ﺍﯾﮏ ﺩﻥ ﺩﮨﻘﺎﻥ ﮐﮩﯿﮟ ﺳﮯ ﺁﺏ ﺧﻮﺭﺩﮦ ﭘﯿﮍ ﮐﮯ ﺩﻭ ﭨﮑﮍﮮ ﺍﭨﮭﺎ ﻻﯾﺎ ﺗﮭﺎ ﺍﻭﺭ ﺍﻧﮩﯿﮟ ﺻﻠﯿﺐ ﮐﯽ ﻃﺮﺡ ﺭکھ ﮐﺮ ﺍﻥ ﮐﮯ ﺳﯿﻨﮯ ﻣﯿﮟ ﮐﯿﻞ ﭨﮭﻮﮎ ﮐﺮ ﺍﯾﮏ ﺻﻠﯿﺐ ﺑﻨﺎﻟﯽ ﺗﮭﯽ ﭘﺮﺍﻧﮯ ﭘﯿﮍ ﮐﯽ ﭼﮭﺎﻝ ﺟﯿﺴﺎ ﯾﮧ ﻟﺒﺎﺱ ﺩﮨﻘﺎﻥ ﮐﺎ ﭘﺮﺍﻧﺎ ﺑﻮﺳﯿﺪﮦ ﮐﻮﭦ ﺟﺲ ﻣﯿﮟ ﻣﺰﯾﺪ ﭘﯿﻮﻧﺪ ﻟﮕﺎﻧﮯ ﮐﯽ ﺍﺏ ﮐﻮﺋﯽ ﺟﮕﮧ ﮨﯽ ﻧﮩﯿﮟ ﺑﭽﯽ، ﺍﺳﮯ ﭘﮩﻨﺎ ﺩﯾﺎ ﺗﮭﺎ ﮔﮭﺎﺱ ﺍﻭﺭ ﺗﻨﮑﻮﮞ ﺳﮯ ﺑﻨﺎ ﮔﻮﻻ ﻋﻤﻮﺩﯼ ﺍﺱ ﭘﺮ ﺭﮐھ ﮐﺮ ﺍﺱ ﮐﺎ ﺳﺮ ﺑﻨﺎﯾﺎ ﺗﮭﺎ ﺍﻭﺭ ﺩﻭ ﭘﺮﺍﻧﮯ ﮐﺎﮎ ﮐﮯ ﭨﮑﮍﮮ ﻟﮯ ﮐﺮ ﺍﺱ ﻣﯿﮟ ﺁﻧﮑﮭﯿﮟ ﭨﮭﻮﮐﯽ ﺗﮭﯿﮟ، ﮨﻮﺍ ﮐﮩﯿﮟ ﺳﮯ ﺍﯾﮏ ﭘﺮﺍﻧﺎ ﮨﯿﭧ ﺍﮌﺍ ﻻﺋﯽ ﺗﮭﯽ ﺍﺳﮯ ﺍﺱ ﮐﮯ ﺳﺮ ﭘﺮ ﺭﮐﮭﺎ ﺗﮭﺎ ﺍﻭﺭ ﺍﺳﮯ ﮐﮭﯿﺖ ﮐﮯ ﺑﯿﭻ ﮔﺎﮌ ﮐﺮ ﺫﺭﺍ ﻏﻮﺭ ﺳﮯ ﺩﯾﮑﮭﺎ ﺗﻮ ﮨﻨﺲ ﺩﯾﺎ ﺗﮭﺎ۔
” ﺍﻭﺭ ﻭﮦ ‘ ﻣﯿﮟ ‘ ﺗﮭﺎ ”
ﻣﯿﮟ ﺟﻮ ﺍﺯﻝ ﺳﮯ ﺟﺒﺮ ﻣﺴﻠﺴﻞ ﮐﺎ ﻣﺎﺭﺍ ﮨﻮﺍ ﮨﻮﮞ
ﺟﺲ ﺳﮯ ﭘﺮﻧﺪ ﺑﮩﺖ ﮈﺭﺗﮯ ﮨﯿﮟ ﺟﺐ ﮐﮧ ﻣﯿﺮﯼ ﭘﮭﯿﻠﯽ ﮨﻮﺋﯽ ﺑﺎﮨﯿﮟ ﺗﻮ ﺍﻧﮩﯿﮟ ﺍﭘﻨﮯ ﭘﺎﺱ ﺑﻼﺗﯽ ﮨﯿﮟ ﻣﮕﺮ ﻭﮦ ﺩﻭﺭ ﺩﻭﺭ ﺳﮯ ﮨﯽ ﮔﺰﺭﺗﮯ ﮨﯿﮟ ﻣﯿﺮﮮ ﭘﺎﺱ ﺑﮭﯽ ﻧﮩﯿﮟ ﺑﮭﭩﮑﺘﮯ ﻣﮕﺮ ﮐﺒﮭﯽ ﮐﻮﺋﯽ ﺟﻮ ﺑﮭﻮﻻ ﺑﮭﭩﮑﺎ ﺁ ﻧﮑﻠﮯ ﺗﻮ ﻣﺠﮭﮯ ﻓﻮﺭﺍً ﭘﮩﭽﺎﻥ ﺟﺎﺗﺎ ﮨﮯ ﺍﻭﺭ ﭘﮭﺒﺘﯽ ﮐﺴﺘﺎ ﮨﮯ ………
” ﺣﺮﺍﻣﯽ ﺩﺍﻡ ﺯﺍﺩﮦ ”
ﮨﻤﯿﮟ ﮈﺭﺍﺗﺎ ﮨﮯ ………
ﺍﺏ ﺍﺱ ﮐﻮ ﮐﯿﺎ ﺧﺒﺮ ﮐﮧ ﮐﺒﮭﯽ ﮐﺒﮭﯽ ﺩﮨﻘﺎﻥ ِ ﻭﻗﺖ ﺻﻠﯿﺐ ﺍﻭﺭ ﻣﺼﻠﻮﺏ ﮐﻮ ﮨﻢ ﺁﮨﻨﮓ ﮐﺮ ﺩﯾﺘﺎ ﮨﮯ۔ ﺍﺳﮯ ﮐﯿﺎ ﺧﺒﺮ ﮐﮧ ﻣﯿﮟ ﺩﮨﻘﺎﻥ ِ ﺍﺯﻝ ﮐﮯ ﮨﺎﺗھ ﺳﮯ ﺟﺒﺮ ﮐﮯ ﮐﮭﯿﺖ ﻣﯿﮟ ﮔﺎﮌﯼ ﮨﻮﺋﯽ ﺻﻠﯿﺐ ﺑﮭﯽ ﮨﻮﮞ ﺍﻭﺭ ﺍﭘﻨﮯ ﺁﭖ ﻣﯿﮟ ﻣﺼﻠﻮﺏ ﺑﮭﯽ، ﺍﺳﮯ ﮐﯿﺎ ﺧﺒﺮ ﮐﮧ ﻣﯿﮟ ﺑﮭﯽ ﮐﺒﮭﯽ ﺍﮎ ﮨﺮﮮ ﺑﮭﺮﮮ ﭘﯿﮍ ﮐﺎ ﺣﺼﮧ ﺗﮭﺎ، ﺁﻧﺪﮬﯽ ﻃﻮﻓﺎﻥ ﺑﺎﺭﺵ ﭼﮩﺮﮦ ﺟﻼﺗﯽ ﺩﮬﻮﭖ ﭘﮭﻞ ﭘﮭﻮﻝ ﺭﻧﮓ ﺑﺪﻟﺘﮯ ﺁﺋﮯ ﭘﻨﭽﮭﯽ ﻣﺠﮭﮯ ﺳﻨﺘﮯ ﺗﮭﮯ ﺍﻭﺭ ﺍﭘﻨﮯ ﺩﻝ ﮐﺎ ﺣﺎﻝ ﻣﺠﮭﮯ ﺳﻨﺎﺗﮯ ﺗﮭﮯ،
ﻣﯿﮟ ﺯﻣﺎﻧﮯ ﮐﯽ ﻣﭩﯽ ﺳﮯ ﭘﯿﺪﺍ ﮨﻮﺍ ﺳﺐ ﮐﭽھ ﺩﯾﮑﮭﺘﺎ ﺳﻨﺘﺎ ﺗﮭﺎ …
ﭘﮭﺮ ﻭﮦ ﻭﻗﺖ ﺁﻥ ﭘﮩﻨﭽﺎ ﺟﺐ ﻣﯿﺮﺍ ﺟﺴﻢ ﭨﮑﮍﮮ ﭨﮑﮍﮮ ﮨﻮ ﮔﯿﺎ ﺑﺪﻥ ﻣﯿﮟ ﺟﺎﻥ ﻧﺎ ﺭﮨﯽ ﺩﻝ ﺩﺭﺩ ﺳﮯ ﺑﮭﺮ ﮔﯿﺎ
ﺍﻭﺭ ﭘﮭﺮ ﺍﮎ ﺩﻥ ﻣﺠﮭﮯ ﺩﮨﻘﺎﻥ ﺍﭨﮭﺎ ﻻﯾﺎ ﺍﻭﺭ ﺷﺎﯾﺪ ﺍﺏ ﻭﮦ ﺑﮭﯽ ﻣﺠﮭﮯ ﺑﮭﻮﻝ ﺑﯿﭩﮭﺎ ﮨﮯ
ﻭﻗﺖ ﮔﺰﺭﺗﺎ ﺭﮨﺘﺎ ﮨﮯ ……..
ﻭﮦ ﻣﯿﺪﺍﻥ ﻣﯿﺮﮮ ﺳﺎﻣﻨﮯ ﮨﮯ ﺟﺴﮯ ﻣﯿﮟ ﻧﮯ ﺟﺎﻧﮯ ﮐﺘﻨﯽ ﺻﺪﯾﻮﮞ ﯾﻮﮞ ﺩﯾﮑﮭﺎ ﮨﮯ ﺟﯿﺴﮯ ﮐﻮﺋﯽ ﻣﻨﺘﻈﺮ ﺭﺍﮦ ﺩﯾﮑﮭﺘﺎ ﮨﮯ۔
ﺍﺱ ﻣﯿﺪﺍﻥ ﺳﮯ ﺍﮐﺜﺮ ﺍﮎ ﺑﮕﻮﻻ ﺍﭨﮭﺘﺎ ﮨﮯ ﭘﻞ ﺑﮭﺮ ﻣﯿﮟ ﮨﺰﺍﺭ ﮨﺎ ﻗﺮﻧﻮﮞ ﮐﮯ ﺑﻞ ﮐﮭﺎﺗﺎ ﮨُﻮﺍ ﺟﺐ ﻭﮦ ﺍﭨﮭﺘﺎ ﮨﮯ ﺗﻮ ﻣﯿﺮﯼ ﺍﺱ ﺷﺪﺕ ﺳﮯ ﺍﮐﮭﮍﻧﮯ ﮐﯽ ﺧﻮﺍﮨﺶ ﮐﻮ ﻣﮩﻤﯿﺰ ﻣﻠﺘﯽ ﮨﮯ ﺍﻭﺭ ﺍﺱ ﻣﺮﺩﮦ ﺍﻣﯿﺪ ﮐﯽ ﺭﮔﻮﮞ ﻣﯿﮟ ﺯﻧﺪﮔﯽ ﺩﻭﮌﻧﮯ ﻟﮕﺘﯽ ………..
ﺑﮕﻮﻻ ﺑﮭﯽ ﮐﯿﺎ ﺑﺲ ﺯﻣﯿﮟ ﺳﮯ ﺁﺳﻤﺎﮞ ﺗﮏ ﺍﮎ ﺳﺘﻮﻥ ﺍﮎ ﻣﺘﺤﺮﮎ ﻟﮑﯿﺮ ﺟﺲ ﮐﺎ ﺟﺴﻢ ﺑﻨﺎﻧﮯ ﮐﮯ ﻟﯿﮯ ﮨﻮﺍ ﮐﻮ ﺳﻮ ﺳﻮ ﺟﺘﻦ ﮐﺮﻧﮯ ﭘﮍﺗﮯ ﮨﯿﮟ،
ﮨﻮﺍ ﻣﯿﺪﺍﻥ ﻣﯿﮟ ﭼﺎﺭﻭﮞ ﻃﺮﻑ ﺟﮭﺎﮌﻭ ﻟﮕﺎﺗﯽ ﮨﮯ ﺯﻣﯿﮟ ﭘﺮ ﺑﮑﮭﺮﮮ ﭘﺘﮯ، ﺧﺎﮎ، ﺑﺎﮨﻮﮞ ﻣﯿﮟ ﺳﻤﯿﭩﺘﯽ ﮨﻮﺋﯽ ﺍﮎ ﺍﺩﺍ ﺳﮯ ﺑﻞ ﮐﮭﺎﺗﯽ ﮨﮯ ﺗﻮ ﺍﺱ ﮐﺎ ﺟﺴﻢ ﺑﻨﺘﺎ ﮨﮯ ﻣﯿﮟ ﺍﺳﮯ ﺩﻭﺭ ﺳﮯ ﺩﯾﮑﮭﺘﺎ ﺭﮨﺘﺎ ﮨﻮﮞ ﻣﺮﮮ ﻧﺠﺎﺕ ﺩﮨﻨﺪﮦ ﻣﺮﮮ ﻣﺤﺴﻦ ﮐﻮ ﻭﮦ ﺍﮎ ﭘﻞ ﻣﯿﮟ ﮨﺰﺍﺭﻭﮞ ﺳﺎﻝ ﮐﮯ ﺑﻞ ﮐﮭﺎﺗﺎ ﮨُﻮﺍ ﻣﯿﺮﯼ ﺳﻤﺖ ﺑﮍﮬﺘﺎ ﮨﮯ ﯾﮩﯽ ﺍﺱ ﮐﺎ ﻭﻃﯿﺮﮦ ﮨﮯ … ﺁﺝ ﭘﮭﺮ ﺍﮎ ﻧﺌﯽ ﭼﮭﺐ ﮈﮬﺐ ﺳﮯ ﺍﭨﮭﺎ ﮨﮯ، ﺯﺭﺩ ﺭﻧﮓ ﮐﯽ ﺳﺎﮌﮬﯽ ﻣﯿﮟ ﻣﻠﺒﻮﺱ ﻧﺎﺭﯼ ﮐﯽ ﮐﻤﺮ ﺳﺎ ﺑﻞ ﮐﮭﺎﺗﺎ ﮨُﻮﺍ ﺑﺴﺘﯽ ﮐﯽ ﺟﺎﻧﺐ ﺑﮍﮬﺎ ﮨﮯ، ﮔﮭﺮﻭﮞ ﺳﮯ ﭨﮑﺮﺍﺗﺎ ﮨﻮﺍ ﮔﻠﯿﻮﮞ ﮐﮯ ﭘﯿﭻ ﻭ ﺧﻢ ﺳﮯ ﺍﻟﺠﮭﺘﺎ ﮨﻮﺍ ﻣﯿﺮﯼ ﺳﻤﺖ ﺑﮍﮪ ﺭﮨﺎ ﮨﮯ، ﻣﯿﺮﮮ ﺳﯿﻨﮯ ﻣﯿﮟ ﻟﮕﮯ ﮐﯿﻞ ﮐﯽ ﭼﺒﮪﻦ ﺍﻭﺭ ﺯﯾﺎﺩﮦ ﺑﮍﮪ ﮔﺌﯽ ﮨﮯ، ﻣﯿﮟ ﺁﺝ ﭘﮭﺮ ﺧﻮﺩ ﺳﮯ ﯾﮧ ﺳﻮﺍﻝ ﭘﻮﭼھ ﺑﯿﭩﮭﺎ ﮨﻮﮞ ﮐﯿﺎ ﻣﯿﺮﮮ ﺳﯿﻨﮯ ﻣﯿﮟ ﭨﮭﮑﮯ ﺍﺱ ﮐﯿﻞ ﮐﯽ ﭼﺒﮪﻦ ﮐﺒﮭﯽ ﺧﺘﻢ ﮨﻮ ﭘﺎﺋﮯ ﮔﯽ ( ﭘﺮ ﺁﺝ ﺑﮭﯽ ﺍﺱ ﺳﻮﺍﻝ ﮐﯽ ﺷﺪﺕ ﺍﺱ ﺧﻮﺍﮨﺶ ﮐﯽ ﺷﺪﺕ ﺳﮯ ﮐﮩﯿﮟ ﮐﻢ ﮨﮯ ) ﺑﮕﻮﻟﮯ ﮐﯽ ﺳﺎﻧﺴﯿﮟ ﺍﮐﮭﮍ ﮔﺌﯽ ﮨﯿﮟ ﻭﮦ ﮨﻤﯿﺸﮧ ﮐﯽ ﻃﺮﺡ ﮨﺎﻧﭙﺘﺎ ﮐﺎﻧﭙﺘﺎ ﮐﮭﯿﺖ ﮐﯽ ﻃﺮﻑ ﻟﭙﮏ ﺭﮨﺎ ہے، ﺍﺱ ﮐﮯ ﺟﺴﻢ ﮐﮯ ﺍﻋﻀﺎ ﺟﮭﮍ ﺭﮨﮯ ﮨﯿﮟ ﺧﺎﮎ ﺑﯿﭩﮭﻨﮯ ﻟﮕﯽ ﮨﮯ ﮨﻮﺍ ﮐﯽ ﺍﮌﺍﻥ ﺩﮬﯿﻤﯽ ﭘﮍ ﮔﺌﯽ ﮨﮯ،
ﺁﮦ …. ﺍﺱ ﻧﮯ ﺁﺝ ﭘﮭﺮ ﻣﺮﮮ ﻗﺪﻣﻮﮞ ﻣﯿﮟ ﺩﻡ ﺗﻮﮌ ﺩﯾﺎ ﮨﮯ …
ﺁﺧﺮ ﮐﺐ ﺗﮏ ﻣﯿﮟ ﯾﻮﮞ ﮨﯽ ﺍﯾﮏ ﺟﺎ ﺍِﺳﺘﺎﺩﮦ ﯾﮧ ﺳﺐ ﺩﯾﮑﮭﺘﺎ ﺭﮨﻮﮞ ﮔﺎ؟
ﺍﺏ ﺗﻮ ﯾﮧ ﻣﯿﺮﯼ ﺷﺪﺕ ﺳﮯ ﺍﮐﮭﮍﻧﮯ ﮐﯽ ﺧﻮﺍﮨﺶ ﺑﮭﯽ ﺩﻡ ﺗﻮﮌﻧﮯ ﻟﮕﯽ ﮨﮯ!

"اختر عثمان کی نظم سے ماخوذ”

مزید دکھائیں

متعلقہ

Close