آج کا کالم

یہ وہی ترکی ہے

ڈاکٹر محمد رضی الاسلام ندوی

بوڑھے کی آنکھوں میں ایک خاص طرح کی چمک آگئی۔ اس کی آواز بڑی نحیف تھی اور اس میں لڑکھڑاہٹ بھی تھی۔ اپنے جسم کی پوری قوت جمع کرکے وہ گویا ہوا :
"کیا تم لوگ میری آخری خواہش پوری کرو گے؟”
مجلس میں موجود تمام لوگ، جو اس کی عیادت کے لیے آئے تھے، سراپا گوش بن گئے۔ سالارِ لشکر تھوڑا اور قریب ہوا۔ اس نے اپنا کان اس کے منھ سے قریب کرتے ہوئے کہا :
"آپ فرمائیں، ہم اس پر عمل کرنے کی پوری کوشش کریں گے۔ ”
بوڑھے کے چہرے پر رونق آگئی۔ اس نے کہا :”میری خواہش ہے کہ جب میرا انتقال ہو تو شہ سواروں کی ایک جماعت میری نعش کو لے کر دشمنوں کی سرزمین میں گھس جائے اور جہاں تک اس کے لیے ممکن ہو، گھستی چلی جائے، پھر جس جگہ سے آگے بڑھنا اس کے لیے ممکن نہ ہو، وہاں نعش کو دفن کرکے واپس آ جائے۔ ”
"ان شاء اللہ ایسا ہی ہوگا۔ ” سالارِ لشکر نے اس خواہش کی تکمیل کا وعدہ کیا تو بوڑھے کے چہرے پر طمانینت پھیل گئی۔
یہ بزرگ مشہور صحابی رسول حضرت ابو ایوب انصاری رضی اللہ عنہ تھے اور موقع تھا روم کے دار الحکومت قسطنطنیہ پر فوج کشی کا۔ چنانچہ ویسا ہی ہوا جیسا وعدہ کیا گیا تھا۔  حضرت ابو ایوب کی تدفین فصیل بند شہر کے بالکل قریب کی گئی (اسد الغابۃ، ابن الاثیر، دار الشعب، قاہرہ، 2/96)
یہ وہی ترکی ہے۔ حضرت ابو ایوب انصاری کی قبر آج بھی وہاں موجود ہے۔ بس فرق یہ ہے کہ تدفین کے وقت وہ دشمنوں کی سرزمین تھی، لیکن آج اسلام کی عظمت و شوکت اس سے وابستہ ہے۔
ترکی کے بہادر عوام اور بیدار مغز قیادت کو سلام کہ وہ اس کی اسلامیت کو بحال رکھنے کی جی توڑ کوشش کر رہے ہیں۔
اے اللہ! ان لوگوں کو سرخ رُو رکھ اور اسلام دشمنوں کو ان کی سازشوں میں ناکام کر۔
نورِ خدا ہے کفر کی حرکت پہ خندہ زن
پھوکوں سے یہ چراغ بجھایا نہ جائے گا

یہ مصنف کی ذاتی رائے ہے۔
(اس ویب سائٹ کے مضامین کوعام کرنے میں ہمارا تعاون کیجیے۔)
Disclaimer: The opinions expressed within this article/piece are personal views of the author; and do not reflect the views of the Mazameen.com. The Mazameen.com does not assume any responsibility or liability for the same.)


مزید دکھائیں

محمد رضی الاسلام ندوی

ڈاکٹر محمد رضی الاسلام ندوی معروف مصنف اور دانش ور ہیں۔ موصوف تصنیفی اکیڈمی، جماعت اسلامی ہند کے سکریٹری اور سہ ماہی مجلہ تحقیقات اسلامی کے نائب مدیر ہیں۔

متعلقہ

Back to top button
Close