سیاست

مت سمجھنا فقط ہے خوٗں روٗ پوش

میری رگ رگ میں ہے جنوٗں روٗ پوش

افتخار راغبؔ

مت سمجھنا فقط ہے خوٗں روٗ پوش

میری رگ رگ میں ہے جنوٗں روٗ پوش

مل نہ پائے کسی کو کوئی سراغ

تیری آنکھوں میں ہو رہوں روٗ پوش

فطرتِ حسن ٹھہری روٗ پوشی

کچھ بروٗں اور کچھ دروٗں روٗ پوش

نام جس خوب روٗ کا اردوٗ ہے

کیا ہے اُس میں کوئی فسوٗں روٗ پوش

ہے محبت یقین پر قائم

اِس عمارت کے ہیں ستوٗں روٗ پوش

آدمی تو ہیں جلوہ گر ہر سوٗ

آدمیت ہے جانے کیوں روٗ پوش

میں محبت ہوں، بخش مجھ کو نُموٗ

کر نموٗدار گر میں ہوٗں روٗ پوش

جسم سے روٗح تک ہے خستہ حال

کیسے ہو حالتِ زبوں روٗ پوش

اوٹ میں بادلوں کے بدرِ مبیں

میرے شعروں میں ہے وہ یوں روٗ پوش

جانے کب آئے وہ نظر راغبؔ

ہو گیا ہے کہیں سکوٗں روٗ پوش

یہ مصنف کی ذاتی رائے ہے۔
(اس ویب سائٹ کے مضامین کوعام کرنے میں ہمارا تعاون کیجیے۔)
Disclaimer: The opinions expressed within this article/piece are personal views of the author; and do not reflect the views of the Mazameen.com. The Mazameen.com does not assume any responsibility or liability for the same.)


مزید دکھائیں

افتخار راغب

تخلیقِ کارِ کلامِ دل پذیر، علمبردارِ توازنِ لفظ و معنی ، بدرِ آسمانِ شعر و سخنِ قطر اور افتخارِ بزمِ اردو قطر جناب افتخار راغبؔ کا تعلق ہندوستان کے صوبہ بہار سے ہے۔ پیشے سے سول انجنئیر ہیں اور 1998 میں جامعہ ملیہ اسلامیہ دہلی سے بی ٹیک کی ڈگری حاصل کرنے کے بعد مارچ 1999 سے قطر میں ملازمت کے سلسلے میں مقیم ہیں۔ آپ کے چار شعری مجموعۂ کلام، ’لفظوں میں احساس‘ ، ’خیال چہرہ‘ ، ’غزل درخت‘ اور 'یعنی تو' منظرِ عام پر آکر مقبولیت حاصل کر چکے ہیں۔ غزلوں کا پانچواں مجموعہ اور مزاحیہ شاعری کا پہلا مجموعہ زیرِ ترتیب ہیں۔ آپ کی شاعری کی اینڈرائڈ ایپ بھی بن چکی ہے جسے Google Play Store میں Iftekhar Raghib - Urdu Poetry لکھ کر تلاش کرکے انسٹال کیا جا سکتا ہے اس میں چاروں مجموعہ غزلیات دیدہ زیب انداز میں موجود ہیں. افتخار راغبؔ کا شمار قطر کے فعال ترین ادبی شخصیات میں ہوتا ہے۔ آپ قطر کی قدیم ترین اردو تنظیم بزمِ اردو قطر کے 2010 سے جنرل سکریٹری ہیں اور دیگر ادبی تنظیموں میں بھی پیش پیش رہتے ہیں۔ آپ اپنے پختہ کلام کے حوالے سے پوری اردو دنیا میں نئی نسل کے شعراء میں منفرد شناخت رکھتے ہیں۔

متعلقہ

Back to top button
Close