ہندوستان

جناح تو ایک بہاناہے، پولرائزیشن اصل نشانہ ہے

علی گڑ ھ مسلم یونیورسٹی راست نشانے پر اس لئے ہے کہ مسلم تشخص کے حامل اعلیٰ تعلیم کے اس تاریخی ادارہ کی ایک مخصوص شناخت ہے، جوملک کی تاریخ، قیادت، علمی خدمات  پر اثر نداز ہوتی ہے۔

ڈاکٹر اسلم جاوید

گزشتہ دنوں 2 مئی2018 کو علی گڑھ مسلم یونیور سٹی میں سابق نائب صدر جمہوریہ ہند حامد انصاری صاحب کو بھی لائف ٹائم ممبر شپ ایوارڈ دینے کا پروگرام تھا۔ واضح رہے کہ علی گڑھ مسلم یونیورسٹی اورسابق نائب صدر جمہوریہ حامد انصاری ہمیشہ سنگھ کی آنکھوں میں کھٹکتے رہے ہیں۔ حامد انصاری صاحب کو بھلے ہی اپنی مسلم شناخت دوئم درجہ کی لگتی ہو، لیکن سنگھ کے لئے وہ صرف ملک مخالف مسلمان ہیں، جیسا کہ آر ایس ایس  ایک عام مسلمان کے بارے میں سمجھتا ہے۔

 حامد انصاری کے خلاف آر ایس ایس اورفسطائی قوتوں کا غصہ اسی وقت سے بھڑکا ہوا ہے جب انہوں نے ’’دی وائر اردو پورٹل‘‘ کی افتتاحی تقریب میں خطاب کرتے ہوئے کہا تھا کہ اس وقت ملک کے اندر ایسے حالات پیدا کردیے گئے ہیں کہ ہندوستان کا مسلمان خود کو ڈراسہمااور غیر محفوظ محسوس کررہا ہے۔ آر ایس ایس اس سے قبل بھی یہ نہیں چاہتا تھا کہ کوئی مسلمان اور مسلم شناخت رکھنے والی تعلیمی دانش گاہ ترقی پائے اوراس کی کامیابی کا دنیا میں ڈھنڈورا پیٹا جائے وہ کسی بھی تعمیری اورترقیاتی سرگرمیوں میں نمایاں طور پر یاد کی جائے۔ یہ حملہ اس لئے بھی منصوبہ بند لگتاہے کہ آر ایس ایس کے ذریعہ یہ پیغام دینا لازمی تھا کہ کسی مسلمان کو وہ کسی اعلی عہدہ پر دیکھنے کیلئے تیار نہیں ہے۔ ان سب باتوں کے ساتھ ہی علی گڑھ کے ممبر آف پارلیمنٹ، ستیش گوتم کے حمایت یافتہ نوجوانوں اور یوگی آدتیہ ناتھ کی ہندو یوا واہنی کے تربیت یافتہ غنڈوں نے اے ایم یو پر دہشت گردانہ حملہ کیا، جس کا مقصد کیمپس کا ماحول خراب کرنے کے ساتھ ہی سابق نائب صدر جمہوریہ ہند حامد انصاری کوجسمانی نقصان پہنچانا بھی تھا۔

ظاہر سی بات ہے کہ  ہندویوواواہنی کے مسلح غنڈوں کی اس دیدہ دلیری کیخلاف طلباء کا مشتعل ہونا ایک فطری امرتھا، حالا نکہ یہ بات ذہن نشین رہنی چاہئے کہ سنگھی قوتوں کے ذریعہ ہندوتواوادی جوانوں کو منظم طریقہ سے مسلح کرکے اے ایم یو کے ماحول کو خوف زدہ کرنے کیلئے بھیجا گیا تھا اوربھیڑ کی اس دہشت گردانہ یلغار میں مقامی پولیس بھی معاون کے طورپر کام کررہی تھی۔ ویسے بھی علی گڑھ مسلم یونیورسٹی کی تاریخ بتاتی ہے کہ آزادی کے بعد مقامی پولیس کبھی اس عظیم دانش گاہ کی ہمدردنہیں رہی ہے، بلکہ جب بھی اسے موقع ملاہے اس نے ظلم و بہیمیت کی ایسی ہی تاریخ یونیورسٹی کیخلاف رقم کی ہے۔ یہاں بھی صاف نظر آرہا ہے کہ جس وقت ان طلباء پر پولیس نے جان لیواحملے کئے تھے اس وقت یہ طلبا احتجاج نہیں کررہے تھے، بلکہ یہ لوگ قریبی تھانہ میں حملہ کی ایف آئی آر کرانے کیلئے نکلے تھے۔ ان حالات میں تھانہ تک پہنچنے سے روکے جانے پر طلباء کا زبردستی کرنا لازمی تھا۔ مگر اس کے بدلے میں پولیس نے نہتے بچوں پر لاٹھیاں برسائیںاور دودرجن سے زائدطلباء کو سنگین طورپر زخمی کردیا۔ بعدازاں علی گڑھ مسلم یونیورسٹی کے ہزاروں طلبہ نے ہندو غنڈوں کے کیمپس میں گھس کر طلبہ پر حملہ کرنے کیخلاف احتجاجی دھرنا دیا اور اس معاملے کی جوڈیشل انکوائری کا مطالبہ کیا ہے۔ خیال رہے کہ طلباء کا یہ دھرنا ہنوز جاری ہے اور اے ایم یو کے اندر سراسیمگی کا ماحول قائم ہے۔ ہندو غنڈوں نے کیمپس میں گھس کر محمد علی جناح کی تصویر ہٹانے کا مطالبہ کیا تھا اور طلبہ کی جانب سے مزاحمت پر انہیں تشدد کا نشانہ بنایاگیا، جسکے بعد پولیس نے غنڈوں کو روکنے کے بجائے طلبہ ہی پر طاقت کا بہیمانہ استعمال کیا اوراس کارروائی میں 30 طلبہ شدید زخمی ہو گئے۔ یونیورسٹی کے مرکزی گیٹ باب سید پر دھرنا دینے والے طلبہ مسلسل یہ مانگ کررہے ہیں کہ ہمیں انصاف چاہئے اور فاشسٹ طاقتوں کیخلاف انکار کے نعرے  بدستور لگارہے ہیں۔ مظاہرہ پر بیٹھے طلباء بتاتے ہیں کہ یوگی آدتیہ ناتھ کی تنظیم ہندو یوا واہنی کے درجنوں مسلح کارکنوں نے پولیس کی نگرانی میں حملہ کیا تھا۔ ہم الٰہ آباد ہائیکورٹ میں پٹیشن دائر کرنے کیلئے نیشنل ہیومن رائٹس کمیشن کے پاس جائیں گے۔

اب سوال یہ ہے کہ آخر علی گڑھ مسلم یونیورسٹی فرقہ پرست قوتوں کے نشانہ پر کیوں ہے۔ اس بات کو رہنے دیجئے کہ بانی پاکستان محمد علی جناح کی تصویر کوئی ایشو تھا، حقیقت یہ ہے کہ جناح صرف ایک بہانہ ہے، ورنہ یہ تصویر تو وہاں 1938سے آویزاں تھی۔ یہ بھی ایک تلخ سچائی ہے بھارت میں رہنے بسنے والے مسلمانوں نے محمد جناح کو اس وقت بھی قبول نہیں کیا تھا جب وہ سہاونے خواب دکھارہے تھے اور آج یہاں کے مسلمان جناح کو کیسے قبول کرسکتے ہیں جو اپنی آ نکھوں سے جناح کے پاکستان میں جہنم زدہ ماحول کو اپنی آنکھوں سے دیکھ رہے ہیں۔ بہر حال جناح کی تصویر ویاں لائف ٹائم ممبروں کے ساتھ 1938سے ہی ٹنگی ہوئی ہے۔ مگر ان سنگھیوں نے آج تک اس پر کوئی اختلاف درج نہیں کرایا۔ اس کا واضح مطلب یہی ہے کہ جناح ایک بہانہ تھا۔ دراصل فسطائی قوتوں کو علی گڑھ مسلم یو نیورسٹی اور اس جیسے دیگر تمام تعلیمی دارے جہاں سے سیکولرزم اور گنگا جمنی تہذیب، بقائے باہم اور قومی اتحاد کی آوازبلند ہوتی ہو اس سے الرجی ہے۔ یہ حملہ اسی الرجی کا ایک ٹرائل تھا۔ علی گڑ ھ مسلم یونیورسٹی راست نشانے پر اس لئے ہے کہ مسلم تشخص کے حامل اعلیٰ تعلیم کے اس تاریخی ادارہ کی ایک مخصوص شناخت ہے، جوملک کی تاریخ، قیادت، علمی خدمات  پر اثر نداز ہوتی ہے۔

علی گڑھ مسلم یونیورسٹی جو کہ ہندوستان میں تقسیم سے پہلے کی دانشگاہوں میں اپنا ایک منفرد مقام رکھتی ہے ایک ایسے کردار کی حامل ہے جو ہندوستانی معاشرہ کی تکثیری ہم آہنگی اور کثرت میں وحدت کے تصور کی جیتی جاگتی مثال ہے۔ اس ادارہ کا وجود اس حقیقت کا واشگاف اظہار واعلان ہے کہ ایک ایسے ملک میں جہاں مذہبی بنیاد پر تقسیم عمل میں آ چکی ہو وہاں اقلیتوں کے ساتھ کس طرح کا سلوک روا رکھا جاتا ہے۔ یہ یونیورسٹی قومی تعمیر کے مشن کیلئے رجال سازی کی کارگاہ کاایک غیر معمولی ادارہ ہے، جہاں ملک کی تعمیر وترقی کیلئے ہندومسلم تمام طبقات کے ہزاروں افراد تیار ہوئے ہیں۔ ایسے بھی ہزاروں غیر مسلم طلبہ ہیں جن کی رسائی ملک کی دیگر مشہور زمانہ دانشگاہوں تک نا ممکن تھی۔ مگریہ طلبہ علی گڑھ کی سستی تعلیم، اعلی علمی ماحول اور حصولِ علم کے لئے سب کو یکساں مواقع فراہم ہونے کی بنیاد پر اس عظیم دانشگاہ کی طرف متوجہ ہوئے۔ پچھلی کئی دہائیوں سے علی گڑھ مسلم یونیورسٹی ملک کے طول وعرض میں بسنے والے اعلی تعلیم کے خواستگار مسلم وغیرمسلم دلت طلبہ کی پہلی پسند ہے۔ جس کا نتیجہ یہ ہے کہ ان میں سے بہت سے فارغین قومی تعمیر کے کاموں میں اہم ذمہ داریاں نبھا رہے ہیں ملک میں بھی اور بیرونِ ملک بھی۔ ریاست جموں وکشمیر، کیرالہ، تمل ناڈو، بہار اور اسی طرح کی کچھ دیگر ریاستوں میں ہر تعلیم یافتہ مسلمان کا کسی نہ کسی قسم کا تعلق علیگڑھ مسلم یونیورسٹی سے ضرور ہوتا ہے۔ اس طرح بانی مسلم یونیورسٹی سر سید احمد خاں کا قوم کو پسماندگی اور پچھڑے پن سے نکالنے کا مشن پورا ہوتا نظر آتا ہے۔ ایک مسلم ادارہ کے سائے میں قومی وملکی تعمیر کے لئے رجال کار تیار کئے جائیں یہ بات فسطائی قوتوں کو کبھی ہضم نہیں ہوسکتی۔ لہذا موقع غنیمت تھا، ویسے بھی متعدد ریاستی انتخابات اور 2019کے عام انتخابات سے قبل پولرائزیشن کیلئے راہ بھی ہموار کرنی ضروری تھی، لہذا اس موقع کو غنیمت سمجھتے ہوئے اے ایم یو کو محمد علی جناح کے بہانے نفرت کے زد پر لاکھڑا گیا۔

یہ مصنف کی ذاتی رائے ہے۔
(اس ویب سائٹ کے مضامین کوعام کرنے میں ہمارا تعاون کیجیے۔)
Disclaimer: The opinions expressed within this article/piece are personal views of the author; and do not reflect the views of the Mazameen.com. The Mazameen.com does not assume any responsibility or liability for the same.)


مزید دکھائیں

اسلم جاوید

1967ڈاکٹر اسلم جاوید نے ہاپوڑکے ایک معززخاندان میں ڈاکٹرالحاج نصیراحمد صاحب کے گھرمیں آنکھیں کھو لیں ۔ 1989میں آیوروید اینڈ یونانی طبیہ کالج قرول باغ دہلی سے بی یوایم ایس کی تعلیم مکمل کی۔ مسیح الملک حکیم اجمل خان میموریل سوسائٹی کے بانی وجنرل سکریٹری ہیں۔ ملک وبیرون ملک معیاری روزناموں، ماہنامو ں اوردیگر طبی رسالوں میں کاوش قلم شائع ہوتی رہی ہیں۔ 2012 سے ماہنامہ ’ریکس طبی میگزین ‘کے مدیراعلی کے طورپرتحریری خدمات انجام دے رہے ہیں۔ میگزین کی اشاعت عالمی شہرت یافتہ یونانی دواساز کمپنی ریکس ریمیڈیزپرائیویٹ لمیٹیڈ کے کلی تعاون سے ہورہی ہے۔ علاوہ ازیں سوسائٹی کے زیراہتمام منعقد ہونے والے سیمیناروں اورتقسیم ایوارڈ تقاریب کے موقع پرایک معیاری اور مفید ترین سووینرکی اشاعت بھی ان کے زیرادارت ہی ہوتی ہے۔ طبی خدمات کی تائید و اعتراف میں سری لنکاکی کولمبو یونیورسٹی کی جانب سے جنوری2012میں ڈاکٹریٹ کی اعزازی ڈگری سے نوازاگیا۔

متعلقہ

Close