فقہمذہب

چند اہم دینی سوالوں کے جواب (2)

مقبول احمد سلفی

سوال (1): کیا وضو کرکے ستر کھل جائے تو وضو ٹوٹ جائے گا یا ننگے پن میں غسل کرتے وقت وضو کیا تو وضو صحیح ہے ؟
جواب : وضو کی حالت میں ستر کھل جانے سے وضو نہیں ٹوٹتا ہے اور ننگا نہاتے ہوئے کیا گیا وضو بھی باقی رہے گا بشرطیکہ شرمگاہ کو ہاتھ نہ لگا ہو۔

سوال (2): کیاعورت کاجل لگاسکتی ہے ؟
جواب :  کاجل کا شمار زینت کی چیزوں میں ہوتا ہے اور عورت کے لئے  بواسطہ شوہرزینت کی چیزیں اختیار کرنے میں کوئی حرج نہیں ہے۔ میں نے سنا ہے کہ کاجل کی بھی کئی قسمیں ہیں اور بعض قسموں میں آنکھوں اور صحت کے لئے نقصان ہے اس لئے جس میں نقصان ہو اس سے پرہیز کیا جائے۔

سوال (3): کیا یہ بات صحیح ہے کہ حضرت عمر رضی اللہ عنہ مہر طے کرنے لگے تو ایک عورت نے کہا کہ جب اللہ نے طے نہیں کیا تو آپ کون ہوتے ہیں طے کرنے والے  ؟
جواب : یہ بات مختلف تفاسیر میں مذکور ہے کہ جب حضرت عمر رضی اللہ عنہ نے مہر میں کمی کا اعلان کیا تو ایک عورت نے کہا کہ ایسی بات نہیں ہے بلکہ اللہ نے کہا ہے کہ تم چاہو توعورت کو سونے کا خزانہ دیدو۔ یہ بات سورہ  نساء کی آیت نمبر 20 کی تفسیر میں دیکھی جاسکتی ہے۔

سوال (4) : مراقبہ کیا ہوتا ہے، اس کی کچھ حقیقت بتائیں ؟
جواب : اصل میں مراقبہ یہ ہےکہ  انسان اس بات کا احساس کرے کہ اللہ اسے ہمیشہ اور ہرحال میں دیکھ رہاہے، اس کا ظاہر ہو یا باطن ہرچیز سے باخبر ہے۔ یہ تو مومن کا ایمان ہوتا ہے لیکن صوفیوں نے اس کے متعدد مخصوص طریقے ایجاد رکھے ہیں جو انسانوں (بیوی بال بچوں اور دنیاوالوں ) سے بے تعلقی حتی کہ کھانے پینے سے بیزاری بلکہ یہ کہہ لیں دنیا سے الگ ہوکر ایک کٹیا میں مقید ہوکر کان میں روئی رکھ لینے اور اللہ اللہ کا دھیان کرنے کا نام مراقبہ رکھ لیا گیا ہے۔ یا تصور کیا جاتا ہے کہ نور کے دریا میں ہیں یہ تصور آدھے گھنٹے تک قائم رکھا جاتا ہے اس سے روحانی طاقت حاصل ہوتی ہے۔ چونکہ تبلیغی جماعت میں بھی تصوف ہے اس لئے وہاں بھی مراقبہ کا خاص طریقہ رائج ہے۔ چشتی سلسلہ کے مراقبہ میں مذکور ہے کہ ہرہفتہ قبر کے پاس آدھا گھنٹہ سر ڈھانپ کر بیٹھا جائے، اس میں ایک ذکر بھی پڑھنا ہے۔ "اللہ حاضری اللہ ناظری” مراقبہ کے یہ سب مخصوص طریقے تصوف و بےدینی کی تعلیم ہے۔
سوال (5) : میرے والدین بیمار ہیں اور میرے شوہر ان سے ناراض ہیں ان کے پاس عیادت کے لئے کیسے جاؤں جبکہ وہ منع کرتے ہیں  ؟
جواب : والدین کی خدمت بھی ضروری ہے اور شوہر کی اطاعت بھی ضروری ہے۔ آپ کو مشورہ دوں گا کہ شوہر کو ناراض کرکے والدین کی عیادت کرنے نہ جائیں ، بسااوقات بیوی کی معمولی سی غلطی سے طلاق کی نوبت آجاتی ہےاوربسابسایا  گھر لمحوں میں اجڑ جاتا ہے۔ عورت میں اللہ نے بے پناہ خوبیاں رکھی ہیں وہ جسے چاہے خوش کرسکتی ہے، شوہر تو آپ کی زندگی ہے، ان کی اچھی اور بری عادتوں اور پسند وناپسند سے بخوبی واقف ہوں گی؟۔ بھلے شوہر آپ کے ساتھ میکہ نہ جائے مگر انہیں کسی پسندیدہ کام پر راضی کرکے آپ جاسکتی ہیں ۔ اللہ آپ کے لئے آسانی فرمائے۔

سوال (6): کیا مسلمان دیوالی کے موقع پر پٹاخے کی خریدوفروخت کرسکتا ہے ؟
جواب : دیوالی ہندؤں کا مذہبی تہوار ہے اس موقع پہ کسی مسلمان کو ایسا کوئی کام کرنے کی اجازت نہیں ہے جس سے اس کے تہوار پہ مدد ملے۔ پٹاخہ کی تجارت تو کبھی بھی جائز نہیں ہے کیونکہ یہ انسانوں کے لئے مضر ہے اور بطور خاص دیوالی یا ہندؤں کے کسی مذہبی دن پہ اس کی خرید وفروخت کرنا ان کے مذہبی کام پہ تعاون ہے اور اللہ تعالی نے ہمیں برائی کے  کاموں پر کسی کی مدد کرنے سے منع کیا ہے۔

سوال (7): نماز کے لئے سترہ رکھنے کا کیا حکم ہے جبکہ ہمیں یقین ہو کہ آگے سے کوئی گزرنے والا نہیں  ہے؟
جواب : نماز کے لئے سترہ رکھنا مشروع ومستحب ہے، عموما ہمیں نماز میں سترہ کا اہتمام کرنا چاہئے، دیواریا ستون کو ہی سترہ بنالیں لیکن اگر کوئی نماز کے لئے سترہ  نہ بھی رکھا تو اس کی نماز درست ہے۔

سوال (8): کیا تیل لگا ہو تو وضو ہوجائے گایعنی اعضائے وضو پر تیل لگا ہو اس حالت میں وضو کریں تو وضو ہوجائے گا؟
جواب : عضو پر تیل لگارہنے سے اس پہ پانی انڈیلا جائے تو جلد تک پانی پہنچ جاتا ہے اس وجہ سے وضو صحیح ہے۔

سوال (9) : ایک خاتون نے اپنی والدہ کی صحت یابی کے لئے دس روزہ رکھنے کی منت مانی تھی اور اس نے ایک ہی روزہ رکھا کہ والدہ فوت ہوگئیں تو باقی کے روزے پورے کرنے ہیں ؟
جواب : سوال سے بظاہر معلوم ہوتا ہے کہ خاتون نے والدہ کی صحتیابی کی منت مان کے روزہ رکھنا شروع کردیا جبکہ ہونا یہ چاہئے تھا کہ والدہ صحت یاب ہوجاتیں تو منت کے روزے رکھتی۔ بہر کیف! اگر صورت حال ایسی رہی ہو تو اس کے اوپر کوئی روزہ نہیں کیونکہ منت پوری نہیں ہوئی۔

سوال (10) : کیا نیل گائے کا دودھ پی سکتے ہیں ؟
جواب : نیل گائے جسے عربی میں حماروحشی یعنی جنگلی گدھا کہتے ہیں حلال ہے اور حلال جانور کا گوشت اور دودھ بھی حلال ہے۔

سوال (11): کیا ہندو عورت مسلمان کے گھر کام کاج اور کھانے بنانے کا کام کرسکتی ہے شریعت کی روشنی میں رہنمائی کریں ۔
جواب : ہمیں کسی مسلمان عورت کو اپنے گھر کام کرنے کے لئے رکھنا چاہئے اس سے اپنی مسلمان بہن کی معاشی مدد ہوجائے گی اور اس  میں  بھی کوئی مضائقہ نہیں کہ کوئی ہندو عورت مسلمان کے گھر کام کاج کرے لیکن اسلامی حدود میں رہ کر۔  گھر کےمردوں سے تنہائی  یا اختلاط نہ ہو اور کام میں صفائی کا اہتمام کرے بذات خود وہ بھی اپنے بدن کو صاف رکھے  اور عریاں لباس نہ پہنے بلکہ جسم کو اچھی طرح سے ڈھانپے، مردوں پر کھانا پروسنے کا کام  نہ کرےاور کام کرکے اس گھر سے چلی جایا کرے۔ کام کرنے والی عورت معمر ہو بطور خاص اس وقت جب گھر میں نوجوان یا غیر شادی شدہ افراد ہوں ۔

سوال (12): ایک بہن کا سوال ہے کہ اس نے نیا گھر بنایا ہے اس میں داخل ہونے سے پہلے صدقہ وغیرہ کیا اور گھر میں سورہ بقرہ کی تلاوت بھی کرائی، اب کچھ اور کرنا ہے اس کی طرف رہنمائی کریں ؟
جواب :نیا گھر تیار ہونے کے بعد بسم اللہ کہہ کر سلام کرتے ہوئےگھر میں داخل ہوجائیں ۔ یہ کافی ہے کیونکہ نبیﷺ سے نئے گھر میں داخل ہونے کا کوئی مخصوص طریقہ نہیں ہے۔ اللہ کی توفیق سے کسی کو نئے گھر کی نعمت ملی اس نے خوشی میں لوگوں کو کھانا کھلا دیا یا غریبوں میں صدقہ کردیا اس میں کوئی حرج نہیں ہے۔ سورہ بقرہ پڑھوانے کے لئے کسی دوسرے کو لانے کی ضرورت نہیں تھی، نہ ہی اس موقع سے سورہ بقرہ پڑھنے کی ضرورت تھی ، گھر میں اذکار و تلاوت خود ہی کرنا چاہئے،اس سے گھر میں برکت نازل ہوگی۔

سوال (13): قریب میں ایک چھوٹی مسجد ہے جس میں جمعہ  کی نماز میں 32 آدمی کے قریب رہتے ہیں تو اس میں جمعہ کی نماز پڑھنا درست ہے جبکہ ایک کلو میٹر آگے بڑی مسجد بھی موجود ہے ؟
جواب : جہاں آپ کے لئے سہولت ہو وہاں جمعہ کی نماز پڑھ لیں ، چھوٹی مسجد میں بھی جہاں نمازیوں کی تعداد 32 ہے نماز جمعہ ہوجائے گی۔

سوال (14): قیامت میں عرش الہی کے سائے میں جو سات لوگ ہوں گے ان میں صرف مرد کا ذکر ہے عورت کیوں نہیں ؟
جواب : قرآن وحدیث میں عام طور سے خطاب مردوں کو ہے مگر اس میں عورت ومرد دونوں شامل ہوتے ہیں سوائے اس حکم کے جو مردوں کے ساتھ خاص ہو۔  ظل الہی والی حدیث بھی مردوں کے ساتھ خاص نہیں ہے بلکہ مردوعورت دونوں کو عام ہے۔ سات قسم کے لوگوں میں سے پانچ قسم میں عورت ومرد دونوں شامل ہیں ۔ وہ نوجوان لڑکے اور لڑکیاں جن کی جوانی عبادت میں گزری ہو، اللہ کی رضا کے لئےایک دوسرے سے محبت کرنے والے مرد اور ایک دوسرے سے محبت کرنے والی عورتیں ، وہ مرد یا عورت جو تنہائی میں اللہ کو یاد کرکے رو پڑے، وہ مرد جسے منصب وجمال والی عورت برائی کی دعوت دے یا وہ عورت جسے منصب وجمال والامرد برائی کی دعوت دے تو کہے انی اخاف اللہ (میں اللہ سے ڈرتا ہوں )، وہ مرد یا عورت جو چپکے سے صدقہ کرے اس طرح کہ دائیں ہاتھ نے کیا خرچ کیا بائیں کو پتہ نہ چلے۔
مگر امامت مردوں کی خصوصیت اور جماعت سے مسجد میں نماز پڑھنا بھی ان کے لئے،عورت کے لئے سرداری نہیں اور گھر میں نماز پڑھنا اس کے لئےمسجد میں نماز پڑھنے سے افضل ہے۔

سوال (15): عبدالدیان نام رکھنا کیسا ہے ؟
جواب : الدیان، اللہ کا نام ہے اسمائے حسنی میں سے ہے۔ اس کا معنی بدلہ دینے والا، حساب لینے والا، فیصلہ کرنے والاوغیرہ ہے۔ یہ لفظ صحیح حدیث میں وارد ہے، مجمع الزوائد اور الترغیب والترہیب میں قیامت سے متعلق ایک روایت ہے جسے شیخ البانی نے حسن لغیرہ، منذری نے حسن، ہیتمی مکی نے صحیح اور ہیثمی نے اس کے رجال کو ثقہ کہا ہے۔ اس میں جو لفظ ہے وہ ” أنا الدَّيَّان، أنا المَلِك” ہے یعنی میں ہی حساب لینے والا ہوں ، میں ہی بادشاہ ہوں ۔ اس لفظ کو اسمائے حسنی کے طور پر بہت سے اہل علم نے ذکر بھی کیا ہے جیسے خطابی، ابن مندہ، حلیمی، بیہقی، قرطبی اور ابن القیم وغیرہ۔ اس وجہ سے عبدالدیان نام رکھنے میں کوئی حرج نہیں ہے۔

سوال (16): سونے کا دانت لگانا کیسا ہے اور اگرجائز ہے تو وفات کے بعد اسے اتار لینا ہے یا چھوڑ دینا ہے ؟
جواب : زینت کے طور پر مردوں کے لئے سونا کا استعمال حرام ہے لیکن بطور ضرورت سونے کا دانت لگاسکتے ہیں جیساکہ عرفجہ صحابی نے رسول اللہ ﷺ کے حکم پہ سونے کی ناک لگوائی تھی اور اس سونے سے وفات کے بعد اتار کر فائدہ بھی اٹھاسکتے ہیں ۔

سوال (17) : دو آدمی جماعت سے نماز پڑھ رہے ہیں اور ابھی امام آخری تشہد میں بیٹھا ہوا ہے تیسرا آدمی اس جماعت میں کیسے شامل ہوگا؟
جواب : بخاری ومسلم میں ہے کہ نبی ﷺ فرماتے ہیں جسے نماز کی  ایک رکعت ملی اسے نماز مل گئی تو  نماز(جماعت )کا ثواب پانے کے لئے کم از کم ایک رکعت امام کے ساتھ ملنا ضروری ہے۔ اور امام آخری تشہد میں ہے اس میں شامل ہونے کا کوئی فائدہ نہیں ہے اس لئے تیسرا آدمی  انتظار کرے اور امام کے سلام پھیرنے کے بعد دوسرے آدمی کےساتھ جماعت سے نماز پڑھے۔

سوال (18): نکاح شغار کا کیا حکم ہے یعنی بکر، عمر کی بہن سے شادی کرے اور عمر، بکر کی بہن سے ؟
جواب : نکاح شغار ممنوع ہے اس کا طریقہ یہ ہے کہ کوئی آدمی اپنے بیٹے یا بھائی کی شادی کسی آدمی کی بیٹی  یا بہن سے کرواتا ہے اس شرط کے ساتھ کہ وہ بھی اپنے بیٹے یا بھائی کی شادی اس کی بیٹی یا بہن سے کرے۔ یہ دونوں شادی ایک دوسرے پہ منحصر ہوتی ہے، ایک باقی تو دوسری باقی اور ایک ٹوٹی تو دوسری بھی ٹوٹ جاتی ہے۔ اس قسم کے نکاح کو شغار کہا جاتا ہے جوکہ اسلام میں جائز نہیں ہے  خواہ  نکاح میں مہر ہو یا نہ ہو۔

سوال (19): کیا خواتین سونے چاندی کے علاوہ کسی اور میٹل کا بنا ہوا زیور پہن سکتی ہے ؟
جواب :عورت سونے چاندی کے علاوہ دوسرے کسی بھی میٹل کے زیور استعمال کرسکتی ہے، اصلا زینت کی تمام چیزیں عورتوں کے لئےاستعمال کرنا جائز ہے سوائے اس کے جس میں کوئی قباحت ہو۔

سوال (20):مسلم مکان مالک کا اپنے مکان میں دیوالی منانے کی اجازت دینا کیسا ہے ؟
جواب : اصلا مکان اس وجہ سے دیا گیا ہے کہ کرایہ دار اس مکان میں رہائش پذیر ہوگا، اور ظاہرا کرایہ دار ہندو ہو تو وہ اپنے مذہبی امور کو انجام دے گا خواہ دیوالی ہو یا اور کوئی پوجا۔ گھر میں بھی غیراللہ کی عبادت کرتا ہوگا، اس کی تصویر رکھا ہوگا۔ اگر مکان مالک نے کرایہ دار سے شروع میں ان کاموں کی ممانعت کی تھی تو اصولا صاحب مکان کو ان کے ان کاموں سے روکنے کا حق ہے۔ اسلام ایسا مذہب ہے جو دوسروں کو اپنے اخلاق وکردار سے متاثر کرتا ہے۔ مسلمان مکان مالک کو چاہئے کہ اپنے ہندو کرایہ دار سے نرمی کا رویہ برتے اوراس کو اپنے اخلاقی رویہ کے ساتھ اسلام سے روشناس کرائے۔ یعنی ایک مسلمان ہونے کی حیثیت سے ہندو پر اسلام پیش کرکے اپنی طرف سے حجت قائم کردے تاکہ وہ اللہ کے یہاں اس ذمہ داری سے بری ہوجائے، ساتھ ہی قیامت میں وہ ہندو اللہ کے حضور اسلام نہ جاننے کا بہانہ نہ بناسکے۔

مزید دکھائیں

مقبول احمد سلفی

مرکزالدعوۃ والارشاد، طائف، سعودی عرب

متعلقہ

Close