آئینۂ عالم

شام: کیمیائی ہتھیار اور معصوم بچے!

شیخ خالد زاہد

سینے میں اگر دل دھڑک رہا ہے تو آپ ابھی زندہ ہیں مگر اس زندگی کو آپ پر اگر اجیرن کر دیا جائے یعنی آپ کی دھڑکنوں کو قید کرنے کی کوشش کی جائے آپ کی سانسوں کو روکنے کی کوشش کی جائے اور سب سے بڑھ کر یہ کہ آپ بلکل بے اختیار ہو آپ کے پاس اپنی صفائی میں اپنے دفاع میں کرنے کو کچھ نا ہو۔ جی ہاں شام کے لوگوں کی وہاں کہ معصوم بچوں کی اس سے بھی بدتر حالت ہے۔ ہمارے لئے کیا یہ طے کرنا ضروری ہے کہ ان کا مذہب کیا ہے یا ان کا فرقہ کیا ہے ؟ ہمیں انکی کھال کی رنگت معلوم کرنی چاہئے اور ویسے بھی ہم نے کرنا کیا ہے، چند تعذیتی جذباتی الفاظ اور کچھ نام نہاد تجاویز اور بس۔

گھٹن ذدہ آب و ہوا میں دم توڑتی سانسیں تو ان ہی معصوم بچوں نے لینی ہیں جو شام نامی ملک میں پیدا ہوئے ہیں انکا قصور کچھ بھی نہیں ہے سوائے اسکے کہ قدرت نے انہیں شام کی سرزمین پر پیدا کیا ہے۔ ملک شام اور اسکے باشندے معلوم نہیں کس کی انا کی بھینٹ چڑھ رہے ہیں ۔ جو کوئی بھی ہے انتہائی درجے کی بے حسی میں مبتلا ہے اور ہلاکو اور چنگیز خان کی بدترین تاریخ کو دھرانے کہ درپے ہے۔

انڈیا نے کشمیر میں اپنے ظلم کےجھنڈے گاڑ رکھے ہیں اور اسرائیل نہتے فلسطینیوں پر جدید اسلحہ آزماء رہا ہے اسکے بعد مگر سب سے اول پر اب "شام” آچکا ہے جہاں ظلم و بربریت کی نئی تاریخ رقم کی جا رہی ہے۔ ظلم اور بربریت کی ایسی داستانیں کہ مورخ کا قلم بھی لکھتے ہوئے شرم سے پانی پانی ہوجاتا ہوگا کہ انسانیت کی ایسی توہین و تذلیل کبھی نا لکھی اور نا دیکھی۔

بہت واضح طور پر سمجھ آنے لگا ہے کہ انسانی زندگیوں کی کوئی اہمیت نہیں رہی بلکہ انسانوں سے کہیں زیادہ اہمیت زمین پر پائے جانے والے جناور اور کیڑوں مکوڑوں کی ہوچکی۔ اب اس بات کا تعین کرنا مشکل ہوتا جا رہا ہے کہ ان درندہ صفت لوگوں کو اقتدار پر قبضہ کرنا ہے یا پھر خالی زمین پر قبضہ چاہئے۔ آخر کب تک اتنی خاموشی سے معصوم بچوں کی سہمی بلکتی تصویریں دیکھتے رہینگے اور بس ہاتھ پر ہاتھ دھرے بیٹھے رہینگے۔ کھانے کا انتظام کردینا یا دواؤں مہیا کردینا یا پھر پینے کیلئے صاف پانی فراہم کردینا ان لوگوں کے مسائل حل نہیں کرسکتے۔ انکے گھر ٹوٹ چکے ہیں یہ بے آب و گیا ہیں ، اقوام متحدہ اور اقوام عالم کی بے حسی پر مبہوت بیٹھے ہیں یہ دنیا کی خوشحال قوموں میں شمار کی جانے والی قوموں میں سے ایک ہے۔ ان کا سکون ان کا چین سب غارت ہوگیا ہے اور اسکی بنیادی وجہ انتقالِ اقتدار ہے اور ہم سب ہی جانتے ہیں یہ آگ اور خون کا کھیل کس کو پسند ہے۔

آج میرا دل شام کے معصوم بچوں کی گھٹتی ہوئی سانسوں کو محسوس کر کہ زاروقطار رور رہا ہے بلک رہا ہے، میں اپنی حیثیت میں اس مضمون کے توسط سے شام کے مظلوموں سے اظہارِ یکجہتی کرتا ہوں اور دنیا میں امن کی شمع جلانے والوں کو دعوت دیتا ہوں کہ آئیں اپنا کچھ نا کچھ کردار ان معصوم بچوں کے لئے ادا کریں جو ابھی ٹھیک طرح سے زندگی کا لفظ بھی نہیں بول پائے تھے مگر انہیں مکمل موت نے جکڑ لیا ہے۔

یہ مصنف کی ذاتی رائے ہے۔
(اس ویب سائٹ کے مضامین کوعام کرنے میں ہمارا تعاون کیجیے۔)
Disclaimer: The opinions expressed within this article/piece are personal views of the author; and do not reflect the views of the Mazameen.com. The Mazameen.com does not assume any responsibility or liability for the same.)


مزید دکھائیں

متعلقہ

Close