حمد باری تعالیٰ

اختر مسلمی

کروں وصف کیا میں بیاں ترا تِری شان جلّ جلالہٗ

تری ذات لائقِ ہر ثنا تری شان جلّ جلالہٗ

…

تری کار سازی سے آشنا نہ ہوئے پیمبر و اولیاء

ترا بھید کوئی نہ پا سکا تری شان جلّ جلالہٗ

…

جو مریضِ غم کی کرے دوا دلِ درد مند کو دے شفا

نہیں اور کوئی ترے سوا تری شان جلّ جلالہٗ

…

تو سکونِ دل تو قرارِ جاں تو معین و حامی بے کساں

تو ہی بے سہاروں کا آسرا تری شان جلّ جلالہٗ

…

تو رحیم ہے تو کریم ہے تو علیم ہے تو حکیم ہے

مرے دل کو کردے سکوں عطا تری شان جلّ جلالہٗ

…

میں گناہ گار ہوں سر بسر مرے حالِ زار پر رحم کر

تری رحمتوں کا ہے آسرا تری شان جلّ جلالہٗ

…

وہ رسولِ خاتمِ انبیاء شہِ دیں محمد مصطفیٰؐ

ہمیں ایسا راہ نما دیا تری شان جلّ جلالہٗ

…

ترا بندہ اخترؔ مسلمی ترے در پہ سر بسجود ہے

ہے لبوں پہ اس کے تری ثنا تری شان جلّ جلالہٗ