عبدالکریم شاد
کسی بھی حال میں وہ نیک کام کرتے ہیں
جو لوگ طاعتِ خیر الانام کرتے ہیں
…
انھی کے گھر میں فرشتے قیام کرتے ہیں
"جو اہتمام درود و سلام کرتے ہیں”
…
کوئی جو ان کی حدیثیں ہمیں سناتا ہے
تو ایسا لگتا ہے وہ خود کلام کرتے ہیں
…
جو دل میں ان کی محبت بسائے رکھتے ہیں
وہ لوگ خلد میں اپنا مقام کرتے ہیں
…
ہمیشہ رہتے ہیں ثابت قدم جہاں میں کہ ہم
قدم قدم پہ نبی کو امام کرتے ہیں
…
بھٹکتے پھرتے ہیں وہ سالکین جنگل میں
جو مصطفیٰ کے سوا کو امام کرتے ہیں
…
وہ بد نصیب جو کرتے ہیں بدعتیں ایجاد
نبی کے حوض پہ انکارِ جام کرتے ہیں
…
قلم, دوات, فضا, دست, عقل, دل, کاغذ
نبی کی نعت نگاری تمام کرتے ہیں
…
بیان کیا کروں خوش بختئ ابو ایوب
نبی کے رہنے کا وہ انتظام کرتے ہیں
…
ہمیشہ رہتی ہے چہرے پہ ان کے شادابی
مرے نبی کا جو پیغام عام کرتے ہیں
…
جو ان کی بات نکل آئے فیصلہ ہو جائے
نبی کی ذات کا ہم احترام کرتے ہیں
…
جنہیں ملی ہو محمد کی تربیت اے شاد!
وہی تمیز حلال و حرام کرتے ہیں
تبصرے بند ہیں۔