ٹہنیاں خشک ہیں، کب ان پہ ثمر لگتا ہے

عادل حیات

ٹہنیاں خشک ہیں، کب ان پہ ثمر لگتا ہے
کیسا ویران مرا خواب شجر لگتا ہے

…

سوچ پلکوں پہ مری دھند دھواں کچھ بھی نہیں
کتنا بے رنگ تخیل کا سفر لگتا ہے

…

خواہشیں ہیں نہ شفق رنگ تمنا کوئی
جسم کی قید میں دل اپنا کھنڈر لگتا ہے

…

رات ناگن کی طرح ڈس کے چلی جاتی ہے
دن نکلتا ہے تو پرچھائیں سے ڈر لگتا ہے

…

چشم بینا پہ رہا خوف کا سایہ ہر وقت
کیسا خوں بار مری جاں کا سفر لگتا ہے

…

کیوں ہواؤں میں معلق سا ہوا ہوں میں بھی
کیوں الگ جسم سے ہر شخص کا سر لگتا ہے

…

یاد کر کے جو اسے آج میں رویا عادل
آکے کے پلکوں پہ مری اشک گہر لگتا ہے