یہ حرف حرف رسولِ ؐ انام ، آپؐ کے نام
متاعِ فکر و خیال و کلام ، آپؐ کے نام
صبا کے دوش پہ گلہائے نعت پیش کروں
بصد عقیدت و صد احترام ، آپؐ کے نام
مدام کوثر و تسنیم سے وضو کر کے
فرشتے بھیجیں درود و سلام ، آپؐ کے نام
محمد ؐ ، احمدؐ و محمودؐ ، قاسمؐ و یاسیںؐ
منیرؐ و حامدؐ و ٰطہٰؐ ، امامؐ ، آپؐ کے نام
عطا ہو رزقِ سخن ، فکر و آگہی تو لکھوں
ثنا و نعت ، قصیدے تمام ، آپؐ کے نام
کتابِ رشد و ہدایت کے ہر ورق کا حضورؐ
ہے لفظ لفظ مقدس پیام ، آپؐ کے نام
تبصرے بند ہیں۔