احمد علی برقیؔ اعظمی
راہِ حق ہم کو دکھانے ماہِ رمضاں آگیا
خوابِ غفلت سے جگانے ماہِ رمضاں آگیا
…
ہے کُھلا بابِ اجابت اہلِ ایماں کے لئے
نارِ دوزخ سے بچانے ماہِ رمضاں آگیا
…
کون اسلامی شریعت پر ہے کتنا کاربند
استقامت آزمانے ماہِ رمضاں آگیا
…
جل رہے ہیں ہرطرف مہر و محبت کے چراغ
تیرگیٔ دل مٹانے ماہِ رمضاں آگیا
…
دور کرنے بندۂ مومن کا ذہنی انتشار
خانۂ دل کو سجانے ماہِ رمضاں آگیا
…
خوانِ نعمت باز ہے اللہ کا سب کے لئے
نعمتیں سب پر لُٹانے ماہِ رمضاں آگیا
…
ہے نزولِ قرآں کا جس ماہ کوحاصل شرف
ہر گُنہہ کو بخشوانے ماہِ رمضاں آگیا
…
ہے یہ برقیؔ اعظمی قُفلِ سعادت کی کلید
’’کُھل گئے رب کے خزانے ماہِ رمضاں آگیا‘‘
تبصرے بند ہیں۔