اردو ہے جس کا نام وہ ہے اک زبانِ دل

احمد علی برقی اعظمی

اردو ہے جس کا نام وہ ہے اک زبانِ دل
ہے رہروانِ شوق کی یہ رازدانِ دل

یہ میزباں کبھی ہے، کبھی میہمانِ دل
ہے اہلِ دل کے واسطے یہ ارمُغانِ دل

ملتا ہیجس کے سائے میں سب کو نشاطِ روح
ہے یہ دیارِ شوق میں وہ سائبانِ دل

سینچا ہے خونِ دل سے جسے میرؔ و داغ ؔ نے
ہے داستانَ سوزِ دروں، ترجمانِ دل

غالبؔ نے دی ہے دادِ سخن جس زبان میں
لیتی ہے اہلِ ذوق سے وہ امتحانِ دل

جس سے شکار کرتی ہے تیرِ نگاہِ ناز
اس کے ہی دستِ ناز میں ہے وہ کمانِ دل

اردو غزل سے بڑھ کے نہیں کوئی دلنواز
برقیؔ شبِ فراق میں ہے پاسبانِ دل