مجاہد ہادؔی ایلولوی
امام الانبیاء ہیں وہ امامت شان ہے جن کی
وہی قائد ہمارے ہیں قیادت شان ہے جن کی
…
مثالی بن گئی جود و سخا حاتم کی دنیا میں
مگر ان کو نہیں پہنچا سخاوت شان ہے جن کی
…
وہ جن سے حاکموں نے بھی سیاست کا سبق سیکھا
ہیں وہ فخرِ شہنشاہاں حکومت شان ہے جن کی
…
امانت میں صداقت میں مثال ان کی نہیں اب تک
امانت جن پہ نازاں ہے صداقت شان ہے جن کی
…
کلام اُن سا عرب شاعر بھی کرنے سے رہیں عاجز
جو اُمّی ہیں مگر پھربھی بلاغت شان ہے جن کی
…
نہیں ہے کوئی دولت مند احمد مجتبی جیسا
نبوت جن کی دولت ہے رسالت شان ہے جن کی
…
انہوں نے دشمنوں کو بھی دعاؤں سے نوازا ہے
ہیں عالَم کے لئے رحمت محبت شان ہے جن کی
…
لکھے ہادؔی جو وصف سید الکونین وہ کم ہے
محمد مصطفی ہیں وہ شفاعت شان ہے جن کی
تبصرے بند ہیں۔