بے تابیِ جذبات ادھر بھی ہے ادھر بھی
عبدالکریم شاد
بے تابیِ جذبات ادھر بھی ہے ادھر بھی
پابندیِ حالات ادھر بھی ہے ادھر بھی
…
محفل میں تغافل کو تغافل نہ سمجھیے
کچھ قیدِ روایات ادھر بھی ہے ادھر بھی
…
یوں ہی تو نہیں بزم میں ہوتے ہیں اشارے
کوئی نہ کوئی بات ادھر بھی ہے ادھر بھی
…
مژدہ یہ سنایا ہے مرے دل کی تڑپ نے
"اب شوق ملاقات ادھر بھی ہے ادھر بھی”
…
فرقت میں بھلے لگتے نہیں چاند ستارے
ویسے تو حسیں رات ادھر بھی ہے ادھر بھی
…
دیکھیں کہ محبت نے کسے کتنا بھگویا
اس ابر کی برسات ادھر بھی ہے ادھر بھی
…
تاثیر تو کچھ بھی نہیں باتوں میں کسی کی
ہاں زورِ بیانات ادھر بھی ہے ادھر بھی
…
کچھ ہوتے دلائل تو کوئی بات بھی بنتی
الزام کی بہتات ادھر بھی ہے ادھر بھی
…
سنتا ہے بھلا کون مقابل کے جوابات
اک شورِ سوالات ادھر بھی ہے ادھر بھی
…
گفتار کے آداب کا فقدان ہے لیکن
الفاظ کی بہتات ادھر بھی ہے ادھر بھی
…
خاموش تماشائی بنے بیٹھے ہیں سب لوگ
اظہار کمالات ادھر بھی ہے ادھر بھی
…
زندانِ فراق ایسا موافق ہے ہمارے
زنجیرِ خیالات ادھر بھی ہے ادھر بھی
…
ہم کو یہ گماں تھا کہ سدا شاد رہیں گے
اب شکوۂ حالات ادھر بھی ہے ادھر بھی
تبصرے بند ہیں۔