افتخار راغبؔ
امن و اماں کے جسم کو ہو جائے جاں نصیب
اب تو بہار بخت ہو گلشن خزاں نصیب
…
دل میرا اجتناب گزیدہ کرے بھی کیا
ہوتی ہے اُن کی چشمِ عنایت کہاں نصیب
…
نابود ہو نہ جائے کہیں پھر نہالِ ربط
بارانِ التفات کہاں مہرباں نصیب
…
چشمِ صد اشتیاق میں ہو غرق کوئی عکس
اور قلبِ خوش نصیب کو دردِ نہاں نصیب
…
ہو باریاب شمعِ محبت کی آرزو
مانندِ شمس ہو جو کبھی ضوفشاں نصیب
…
بڑھتی ہی جائے تیرے چراغوں کی روشنی
تیرے نصیب کا بھی ہو مجھ کو دھواں نصیب
…
خوش بو بنا لیا ہے بکھرتے وجود کو
لے جائے اب ہوا میں اڑا کر جہاں نصیب
…
نا قدریوں سے ماند پڑے گا نہ آفتاب
کیا غم جو میرے فن کو نہیں قدر داں نصیب
…
راغبؔ ہو بانکپن پہ غزل کے دلِ سخن
اور نطقِ افتخار کو اردو زباں نصیب
تبصرے بند ہیں۔