موجِ خون سر سے گزرنی ہے گزربھی جائے

عبداللہ ندیم

موجِ خون سر سے گزرنی ہے گزربھی جائے

حادثہ ہو بھی رہے تاکہ یہ ڈر بھی جائے

۔

خوں میں دوڑے کہ لہو آنکھ سے بن کر ٹپکے

غم اسی جسم میں رہتا ہے جدھر بھی جائے

۔

کب تلک حضرتِ مجنوں پہ ہی الزام لگے

تہمتِ عشق کسی اور کے سر بھی جائے

۔

خلعتِ عشق اتارے ہوئے مدت گزری

اب بدن سے یہ ترا رنگ اتر بھی جائے

۔

رائیگاں جائے نہ اس طور یہ وحشت کا سفر

ہاتھ صحرا نہ لگے ساتھ میں گھر بھی جائے

۔

ہے مرے شوقِ سفر کی یہ کرامت بھی ندیم

ساتھ منزل پہ مرے راہ گزر بھی جائے