کھل اٹھا نخلِ طبیعت شکریہ
افتخار راغبؔ
کھل اٹھا نخلِ طبیعت شکریہ
شکریہ ابرِ عنایت شکریہ
…
اب نمٹنے دیجیے دل سے مجھے
آپ نے کر دی نصیحت شکریہ
…
آپ کی تھوڑی توجہ ہے بہت
بڑھ گئی لفظوں کی ہمت شکریہ
…
اُس نے پہنچائی مجھے تکلیف اور
دل سے نکلا حسبِ عادت شکریہ
…
حال پوچھا اور دعائے خیر دی
آپ نے کی اتنی زحمت شکریہ
…
مسکراہٹ ہے کہ انجکشن کوئی
اب بہت اچھی ہے حالت شکریہ
…
قابلِ صد رشک تیرا التفات
کھُل گئی تقدیرِ الفت شکریہ
…
مت ہٹانا تم مرے سینے سے ہاتھ
مل رہی ہے دل کو راحت شکریہ
…
تیری آنکھوں کی چمک ہی کے طفیل
شعر میں آتی ہے ندرت شکریہ
…
ہو کے راغبؔ آپ نے مانگا مجھے
بڑھ گئی میری بھی قیمت شکریہ
تبصرے بند ہیں۔