رموزِ چشم و لب مبہم نہیں نا
افتخار راغبؔ
رموزِ چشم و لب مبہم نہیں نا
چراغِ دل کی لو مدھم نہیں نا
…
تڑپتے ہو بہت میں جانتا ہوں
مگر میری طرح ہردم نہیں نا
…
ہماری مسکراہٹ پڑھ رہے ہو
تمھاری آنکھ دیکھو نم نہیں نا
…
یہ لطفِ شادمانی رنج سے ہے
کہ اچھا ایک سا موسم نہیں نا
…
ستم ڈھاتا ہے دل بھی بے تحاشا
سکوں سے بیٹھتے بھی ہم نہیں نا
…
مرے پہلو میں ہے وہ بدرِ کامل
کہیں یہ خواب کا عالم نہیں نا
…
نہیں مٹتی زبانِ دل کی لکنت
قلم میں بھی ابھی وہ دم نہیں نا
…
غبارِ یاسیت بکھرا ہوا ہے
طبیعت آس کی برہم نہیں نا
…
پلٹ کر دیکھ بھرنا زخمِ دل کا
نگاہوں میں تری مرہم نہیں نا
…
شرافت سے بسر کس طرح ہوگی
شرارت بھی تمھاری کم نہیں نا
…
زہے قسمت! ہے راغبؔ ایک غم خوار
میسر وہ مگر ہردم نہیں نا
Bahut umdah