مجھ سا دیوانہ میری طرح مبتلا کون تھا
افتخار راغبؔ
مجھ سا دیوانہ میری طرح مبتلا کون تھا
تیری آنکھوں میں مجھ سے زیادہ بھلا کون تھا
…
کون آنکھوں کی ٹھنڈک تھا، دل کا سکوں کیا کہوں
یاد کر میرے ہر اک مرض کی دوا کون تھا
…
کون ڈھاتا تھا چاہت پہ میری ستم دم بدم
پیکرِ ضبط، تصویرِ شرم و حیا کون تھا
…
کون تھا قلب کے تخت پر جلوہ گر یاد کر
یاد کر کشورِ دل میں فرماں روا کون تھا
…
کون تھا جس کی شوخی نے مارا مجھے پیار سے
میرے احوال پر مستقل ہنس رہا کون تھا
…
کون کہتا تھا اف اپنا راغبؔ مجھے فخر سے
ذہن پر اپنے کچھ زور دے کر بتا کون تھا
تبصرے بند ہیں۔