کتنا الجھا ہے جال بوسے کا

عبدالکریم شاد

کتنا الجھا ہے جال بوسے کا

پیار سے بل نکال بوسے کا

…

پھر نہ کرنا ملال بوسے کا

خود ہی داعی ہے گال بوسے کا

…

اس نے پوچھا تھا حالِ دل مجھ سے

لب پہ آیا سوال بوسے کا

…

اس نے غصے سے اس طرح دیکھا

مجھ کو آیا خیال بوسے کا

…

ہار تو مان لی طبیبوں نے

دیکھنا ہے کمال بوسے کا

…

اس کے چہرے کی اڑ گئی رنگت

کر دیا جب سوال بوسے کا

…

وہ غصیلی نگاہ شرمائی

یہ بھی ہے اک کمال بوسے کا

…

صبر کا پھل سنا ہے میٹھا ہے

منتظر ہوں حلال بوسے کا

…

صرف احساس لب کو ہے ورنہ

ذائقہ ہے محال بوسے کا

…

سوکھ جائیں نہ ہونٹ شامِ وصل!

کوئی رستا نکال بوسے کا

…

سوچتا ہوں اسے دمِ رخصت

کاش! آئے خیال بوسے کا

…

ان کے ہونٹوں کا رنگ کہتا ہے

آج ہے احتمال بوسے کا

…

رشکِ رخسار ہو گئے مرے لب

دیکھ کر نقش لال بوسے کا

…

سامنے تشنہ لب کے مت چھلکا

جام ساقی! سنبھال بوسے کا

…

کتنا مہنگا ہے غیر موسم میں

آم کی طرح مال بوسے کا

…

شاد ہو جاؤں کس طرح جاناں!

"ہے تبسم مآل بوسے کا”