کیوں زمیں خاموش ہے اور آسماں خاموش ہے

محمد نعمت اللہ برہاروی

کیوں زمیں خاموش ہے اور آسماں خاموش ہے
اے خدا پھر آج کیوں سارا جہاں خاموش ہے
…

ظلم کی شدت بھی اتنی بڑھ گئی ہے ہر طرف

دیکھنے کے بعد بھی کیوں حکمراں خاموش ہے
…

لٹ رہا ہے دیش میرا گائے میں اور  چائے  میں

اب  بھی  لیکن  ملک  کا  نیتا  یہاں  خاموش  ہے
…

فیصلہ  بھی کر  رہا  تھا حق و باطل میں جو  کل
آج  کیوں  اس  قافلے  کا  مہرباں  خاموش  ہے
…

میں بھی کس کس کو سناٶں حال اپنا اب یہاں
جانتا  ہے  راز  جو  وہ  رازداں  خاموش  ہے
…

بات دل کی ساری میں نے نظم کردی شعر میں
آج  ہر  سو  اس  لیے  میری  زباں  خاموش  ہے
…

جب سے رکھا  ہے قدم  اس عشق  کی  دہلیز  پر
تب سے نعمتؔ کا قلم  بھی اب کہاں خاموش ہے