گہوارۂ تہذیب کی معمار ہے عورت
احمد علی برقیؔ اعظمی
آرائش و تزئین سے سرشار ہے عورت
فطرت کے ہر اک حسن کا اظہار ہے عورت
۔
ماں، بیٹی، بہن، بیوی کی صورت میں ہمیشہ
بس پیار ہے، بس پیار ہے بس پیار ہے عورت
۔
ماں وہ ہے نہیں جس کا کہیں کوئی بھی ثانی
ہر شخص کی تعظیم کی حقدار ہے عورت
۔
بیٹی و بہن مونس و غمخوار ہیں سب کی
شوہر کی محبت کی طلبگار ہے عورت
۔
ہے شرم و حیا سے نہیں بڑھ کر کوئی زیور
گہوارۂ تہذیب کی معمار ہے عورت
۔
پاکیزگئ نفس ہے عورت کا تقدس
شیرینئ گفتار کا معیار ہے عورت
۔
اس دورِپُر آشوب میں احمد علی برقیؔ
کیوں ظلم سے اور جبر سے دوچار ہے عورت
تبصرے بند ہیں۔