یادِ رفتگاں: بیاد شمسؔ رمزی مرحوم
احمد علی برقی اعظمی
شمسؔ رمزی تھے جو اقلیمِ سخن کے تاجدار
تھے وہ ادبی محفلوں میں صاحبِ عزو وقار
۔
ہیں صحافی اور سخنور ان کے غم میں سوگوار
اُن کے شاگردوں کی ہے دہلی میں اک لمبی قطار
۔
عہدِ حاضر میں تھے وہ اک ماہرِ فن عروض
جن کے تھے مداح اربابِ نظر میں بیشمار
۔
اُن کا اسلوبِ بیاں تھا ان کی خود اپنی شناخت
جس سے ان کی ندرتِ فکر و نظر تھی آشکار
۔
تھی فلک چھونے کی ان کو زندگی میں آرزو
ان کا ہے مجموعۂ اشعار جس کی یادگار
۔
تھی معطر ان کے گلہائے تغزل سے فضا
گلشنِ اردو میں اُن کی ذات تھی مثلِ بہار
۔
قدرداں ان کے محاسن کا ہے برقیؔ اعظمی
بحرِ ذخارِ ادب کی تھے جو دُرِ شاہوار
تبصرے بند ہیں۔